basterretxea-hedabideak gizartearen eratzaile
DESCRIPTION
Huheziko IKO lizentziako materialaTRANSCRIPT
Ikasgaiaren programa Ikus-entzunezko komunikazioaren teoria 1.LAUHILEKOA
1 > Ikus-entzunezko Komunikazioa > 3. maila > 2010-11 ikasturtea
HUMANITATE ETA HEZKUNTZA ZIENTZIEN
FAKULTATEA
Basterretxea, J.I.(2002). Kultura‐aniztasuna eta gizarte komunikazioa. Bilbo:Udako Euskal Unibertsitatea.65‐70.orr.
HEDABIDEAK GIZARTEAREN ERATZAILE
Mitologien eta erritualen sortzaile dira hedabideak; albisteak hedatzeaz gain,
gizarte‐komunikazioan diharduten bideek mundua ulertzen laguntzeaz gain,
mundua bera eratzen ere laguntzen dute.
Albisteen errituala
Gizakiak erritu ugari dauzka. Denboraren eta Historiaren joan‐etorrian, gizakiak
errituak sortu ditu, ohiturak landu ditu, azturez bete da azkenean. Erritu horietako
batzuk norberarenak dira (goizean kafesnea hartzea, edo fruta jatea, edo biak),
beste asko sozialak dira (ezkontzak edo heriotzaren osteko lurperaketak, kasu).
Gizarte aurreratuetan, erritu modernoetako asko eta asko hedabideei so garatu dira.
Gure mundu zibilizatuan, pertsonaren errituetariko bat albisteen kontsumoa
da. Goizean egunkaria zabaltzea, autoan bidaiatzean irratia entzutea, edo iluntzean
etxeratzean telebistako albistegia ikustea, erritu horren pasarte jakinak dira.
Erlijioetan gertatzen zenaren antzera —demagun kristau‐ohituran domekero
mezatara joatea eta ondoren sermoia komentatzea—, hedabideen mezua aldi oro
entzuten da, eta entzundako horrek ematen du lagunartean berba egiteko giltza edo
bidea. Sermoian esandakoa komentatzen zen moduan komentatzen dira, lankideen
artean, lanera heldu bezain laster, autobusean entzundako partearen albisteak.
Egunaren jarduna markatzen digute hedabideek. Hedabideek markatzen
dituzte egunaren atal nagusiak. Jende‐mota batek albistegien arabera banatzen du
eguna, beste batek magazinen arabera, inork filmeen eta nobelen arabera; kontua
honako hau da: hedabideen jardunak erloju sozialaren zeregina betetzen duela,
hedabideek errutinak sortzen dituztela, hedabideek diskurtso sozialerako gaiak eta
Ikasgaiaren programa Ikus-entzunezko komunikazioaren teoria 1.LAUHILEKOA
2 > Ikus-entzunezko Komunikazioa > 3. maila > 2010-11 ikasturtea
HUMANITATE ETA HEZKUNTZA ZIENTZIEN
FAKULTATEA
ereduak ezartzen dituztela.
Kanpoko munduaz dakigun apurra, hedabideek esana dakigu. Munduaz
dakigunaren iturri nagusia, hedabideak dira: zer gertatzen den, non gertatzen den,
noiz gertatu den eta zergatik gertatzen den, hedabideek jakinarazten dute eta haiek
jakinarazitakoaz kanpo ezer gutxi gehiago jakin dezakegu. Munduaren abiadaren
berri hedabideei esker dugu.
Hedabideek mundua eratzen eta konformatzen laguntzen dute, gure elkarrizketetarako
erreferente bilakatzen dira. Albisteak kontatzeaz gain —egitate eta gertakizun
guztien artean albiste zein diren erabakitzen dutenez—, munduan garrantzitsua
zer den eta zer ez den esaten dute hedabideek. Errepikapenaren ondorioz,
jendeak ikasi egiten du handia zer den eta txikia zer, eta, gero, horren arabera
funtzionatzen du bere bizitza arruntean; beraz, informatzeaz gain, hedabideek gure
buruak eratu eta konformatzen dituzte eta gure pentsatzeko erak eta moduak sortzen
dituzte; munduaz informatzeaz gain, hedabideek mundua bera eratzen dute.
Errituak, erritmoak eta errutinak sortzen dituzte hedabideek; testuinguru horretan,
liturgia bera garrantzitsuago da, liturgia horren oinarrian dagoen afera baino.
Hedabidea ez da gizartearen ispilua
Errituak mundua desitxuratu eta bere erara azaltzen digu. Jakina da: hedabideek
ez dute modu neutralean igortzen informazioa, ezin dute eta. Presio‐taldeak
eta komunikazio‐profesionalak medio, hedabideek informazioa prestatu eta landu
egiten dute.
Kontuz baina: hedabidea ez da egitatearen ispilua. Ispiluak ez du erabakirik
hartzen, hedabideek bai ostera. Erabaki horien oinarrietan, besteak beste, helburu
Ikasgaiaren programa Ikus-entzunezko komunikazioaren teoria 1.LAUHILEKOA
3 > Ikus-entzunezko Komunikazioa > 3. maila > 2010-11 ikasturtea
HUMANITATE ETA HEZKUNTZA ZIENTZIEN
FAKULTATEA
politikoak, denbora mugatua, profesionalen eskua eta baliabideak daude. Ispiluak
bere aurretik igarotzen den oro islatzen du; hedabideak ez, ezin du eta. Ispilua,
zelanbait esanda, erabat askea da bere aurretik igarotzen dena islatzeko. Isla bera
ere askea da, erakusten duena originalarekiko isomorfikoa da (ispilu arruntetan
behintzat). Hedabideak, ostera, ez du askatasun hori.
Adi, zeren hedabidea ez baita leihoa. Leihotik begiratzean ikusten duguna,
gertatzen ari dena da. Gertatzen ari den hori ez dugu guk erabaki. Baina hedabideek
erabaki egiten dute, ez gertatzen dena (sarri askotan baita hori ere), gertatzen
denaz esan beharrekoa baino, hots, erakutsi beharrekoa.
Bada, hedabidea ez da begi neutrala. Hedabideak hautatu egiten du gertatutakotik
zer erakutsi, zer esan, zer irakurtzera eman. Eta hautaketak ez dira neutralak,
edo ez denentzat neutral. Neutraltasuna —balizkoa edozein kasutan— oso norberarena
da. Hedabideak gertakariaren zati bat baino ez ohi du erakusten; baina,
nahita ere, ezingo zukeen osorik eman.
Erlijioagaz gertatzen zaigun berbera gertatzen zaigu informazioagaz. Erlijioak
errealitate bat erakusten du. Errealitate jainkotiar hori, erlijio desberdinek
desberdin ikusten dute; errealitate jainkotiar hori fededun ez direnentzat egon ere
ez dago, ez da existitzen. Hedabideek egitate eta gertaeren ikuspuntu bat ematen
dute. Egitate edo gertaeren ukigarri eta begi‐bistakoa den hori modu desberdinean
ikusten dute hedabide desberdinek. Errealitate hori horrelakoxea da hedabide
horren fededunentzat; fede hori miresten ez dutenentzat errealitate hori existitu ere
ez da egiten.
Ikasgaiaren programa Ikus-entzunezko komunikazioaren teoria 1.LAUHILEKOA
4 > Ikus-entzunezko Komunikazioa > 3. maila > 2010-11 ikasturtea
HUMANITATE ETA HEZKUNTZA ZIENTZIEN
FAKULTATEA
Hona adibide bat:
Torturak kartzeletan. Gara egunkariak tortura Estatuaren politika errepresiboaren
ondorio dela uste du. Correo egunkariak kartzela barruko kolpe
eta jipoi horiek presoen probokazioen ondorio direla. ABC egunkariak ez
du arazoa aipatu ere egiten.
Hedabideak ez dihardu ispilu edo leihoaren antzera. Hedabideak bere modura
eta erara ikusten eta kontatzen du bere begien aurrean gertatu denetik interesgarrien
iruditu zaiona. Hedabideak bere betaurreko propioez ikusten eta erakusten du
mundua.
Kulturak, komunikazioaren jario
«Espazio geografiko jakin batean bizi den talde bateko partaideek konpartitzen
duten ohitura‐multzoa, aztura‐piloa»; era horretan defini daiteke kultura
zer den.
Jendeak dituen sinesmenen eta portaeren arabera garatzen dira kulturak, eta
sinesmen eta portaera horiek, jakina, elkarri komunikatu beharrekoak dira. Etxearen
diseinua, diruaren sistema, janarien ohiturak... pentsaezinak dira, norberak zer
pentsatzen duen eta zelan sentitzen duen azaltzeko beharrezkoa den truke
komunikatibo barik.
Kultura aktiboa, edo bizia, egunero garatzen da taldekideakaz batera. Harremanezko
garapen horren oinarrian, truke komunikatibo horren oinarrian, elkarrekintza
edo interakzioa dugu. Interakzioak igorlearen eta hartzailearen beharra du.
Kultura bizi hori abian jartzen duen organismo biren arteko trukea da elkarrekintza
edo elkarreragina. Robinson Crusoe‐k ez zuen kulturarik garatu Friday‐gaz batu
Ikasgaiaren programa Ikus-entzunezko komunikazioaren teoria 1.LAUHILEKOA
5 > Ikus-entzunezko Komunikazioa > 3. maila > 2010-11 ikasturtea
HUMANITATE ETA HEZKUNTZA ZIENTZIEN
FAKULTATEA
arte. Robinson‐ek bere ohiturak garatu zituen, baina Friday‐gaz trukatu arte, ez
zuen kulturarik garatu.
Ohitura modernoetan, eragin zuzena dute hedabideek, harreman sozialek,
pertsonalitate jakinen proiekzioek, eta taldekideek euren buruez eta gainerakoez
dituzten ideiek eta usteek.
Arestian ere esan da: hedabideek errituak ezarri dituzte gure artean; erritu
horien arteko batek eguneko orduak zelan banatu ekarri digu, kasurako. Albisteen
kontsumoa, esate baterako, pasarte garrantzitsua da gizarte modernoetako liturgia
sozialean; eta gizarte aurreratuetan, pentsaezina da hedabideen jarduna baztertuta
utz lezakeen kultura modernorik sortzea eta garatzea.
Ahalmen intelektualen lanketa eta garapena gizarte‐komunikazioarekin ere
badaude loturik. Hedabideen laguntza barik, pentsaezina da herri edo zibilizazio
bateko gizarte‐egitura finkatzea. Pentsaezina da fenomeno zientifikoen, artistikoen
eta erlijiosoen berri izatea, mezubideen lana baztertuta. Politikak eta ekonomiak ez
zuketen funtzionatuko handika egiten den komunikazio barik.
Komunikatzaileak kultura berriaren sortzaile
Hedabideak dira komunikazioa —zentzurik zabalenean hartuta— menperatzen
duten erakundeak. Komunikazioaz berba egitean, gaur egun, hedabideen komunikazioaz
berba egiten dihardugula konturatzen gara. Eta, konturatu egiten gara eta
ikusi egiten dugu ezen komunikazioan oinarritutako kultura osoa gero eta gehiago
oinarritzen dela komunikazioa ulertzen hasita gauden eredu horietan, alegia, hedabideek
zabaltzen dituzten horietan. Komunikatzaileak komunikazioaren profesionalak
berak dira kulturaren nondik‐norakoak ezartzen dituzten indibiduo espezializatuak.
Ikasgaiaren programa Ikus-entzunezko komunikazioaren teoria 1.LAUHILEKOA
6 > Ikus-entzunezko Komunikazioa > 3. maila > 2010-11 ikasturtea
HUMANITATE ETA HEZKUNTZA ZIENTZIEN
FAKULTATEA
Pentsamenduaren ugazaba modernoak dira orain masa‐komunikazioan diharduten
profesionalak. Hedabideetako profesionalek baztertu egin dituzte intelektual
klasikoak, eta horien lekua eskuratu dute ezagutzaren aldarean.
Gizartea gero eta teknokratagoa bilakatzen ari da abiaduran oinarritutako
zientzia eta teknologia berriak direla eta; hedabideek lagunduta, elite intelektual
berria sortzen ikusten ari gara teknokrazia horien baitan. Elite berriak bere lekua
aurkitu du medioei esker, eta elite kultural edo intelektual klasikoak baino
indartsuago ari da bilakatzen gure begien aurrean.
Bestalde, hedabideetako kazetariak gero eta indar handiagoa, gero eta
zilegitasun handiagoa du ekoizpen kulturalak balioesteko, gaitzesteko edo gorengo
mailakotzat hartzeko. Masa‐hedabideetako kazetariak berak ezartzen du moda
kulturala, aztura politikoa, ohitura soziala edo irizpide ekonomikoa.
Masa‐komunikazioa da gaur egun kultura‐jario publikoaren oinarria.
Komunikazio publikoak, masiboak, mediatikoak, ordezkatu egin du transmisio
kultural klasikoa, eremu txikikoa, hurbilekoa, lokala, aurrez aurrekoa; eta, horren
ordez, kanpokoa, zabala, arrotza, masiboa, globala ezarri du zenbait lekutan. Masa
zabaletan, gaur egun, kultura‐igorpen familiarra bigarren mailakoa da, sarritan.
Kultura‐igorpen masiboak ilundu egin du transmisio klasikoa, belaunaldien artekoa.
Lokalismoa desagertzear ote dago? Baldin eta hedabide masiboek euren lanean
arretarik jartzen ez badute, agian bai. Lokalismoak ez du berme kulturalik izango,
baldin eta hedabide masiboek aintzakotzat hartzen ez badute. Lokalismoak ez du
aurrera egingo, baldin eta masek euren inguruko kultura txikia hedabideen ispiluan
islatzen ikusten ez badute. Lokalak bere hedabide propioak behar ditu globalaren
pareko izan ahal izateko; ez horren menpeko izateko.
Ikasgaiaren programa Ikus-entzunezko komunikazioaren teoria 1.LAUHILEKOA
7 > Ikus-entzunezko Komunikazioa > 3. maila > 2010-11 ikasturtea
HUMANITATE ETA HEZKUNTZA ZIENTZIEN
FAKULTATEA
Beraz, hedabideen isla da kultura. Zer da, gaur, kultura, argitalpenetatik
aparte, telebistatik urrun, irratitik at edo diskoetatik landa?
Hori horrela, hedabideetan diharduten profesionalek erantzukizun sozial
aparta dute. Nahita edo konturatzeke, joera kulturalak ezartzen dituztenez, eredu
berriak sortzen dihardute pulpitu publikoetatik komunikatzaile profesional modernoek.
Nora goaz?
Atal honen azterketa osatzeko, azken berba batzuk komunikazioaren bihar‐
‐etziko jardunari buruz. Norantz doa komunikazioaren industria mende berriko lehen
urteotan? Galderak ausartegia dirudi —ausartegia da— baina komunikazioaren
munduak ausart izatea eskatzen digu. Komunikazio‐munduan zain duguna
berba apur‐apurretan laburbildu beharko bagenu, hurrengo puntu hauek argi ederra
emango ligukete:
1. Informazio‐ eta komunikazio‐teknologien arloari dagokionez, merkatu
horretan aditu direnek aurreratutako datuen arabera, hurrengo urteotan,
mundu‐mailako merkatua hainbat aldiz biderkatuko da. Balizko eroslegaiak
nonahi aurkitu gura dira: telebista‐aparatuak, telefonia eramangarriak
eta internet‐loturak munduaren lau bazterretan saldu gura dituzte.
Hala ere, den‐dena ez da urregorria, eta krisiak berak ere ateak ireki ditu
espektatiba horien guztien artean.
2. Komunikazio‐ eta informazio‐teknologia berriek (faxa, bideoa, sakelako
telefonoak, edo satelite bidezko telebista) ezinezko bilakatuko dute
kultura‐protekzionismoa, bai Europan eta Ozeanian baita Ameriketan
eta Asian ere; Afrika bera ere bidean da.
3. Teknologia berrietan izugarrizko eragina edukiko dute Estatu Batuetako
eta Japoniako enpresen ekoizpen erraldoiek, gaur artekoa gaindituta.
Ikasgaiaren programa Ikus-entzunezko komunikazioaren teoria 1.LAUHILEKOA
8 > Ikus-entzunezko Komunikazioa > 3. maila > 2010-11 ikasturtea
HUMANITATE ETA HEZKUNTZA ZIENTZIEN
FAKULTATEA
4. Informazioaren eta komunikazioaren industria internazionalizaziorantz,
pribatizaziorantz, komertzializaziorantz eta kontzentraziorantz abiatu
da; joera horrek informaziorako hurbilketa justuagoak eta demokratikoagoak
oztopatzen ditu. Oztopoak gero eta gaitzagoak izatea espero da.
5. Gauzak horrela, hedabideen demokratizazioa beharrezkoa den zerbait
da, eta edozein profesionalek erreibindikatu beharko luke demokratizazio
hori, bere lana zerbitzu publiko moduan ulertzen badu.
Telekomunikazioa etorkizunean lekuko izatearen bandera ari da bereganatzen.
Kulturen arteko mugak ezabatuz doaz. Hedabideetan, produktu estatubatuarrek
gero eta sarrera handiagoa dute, telekomunikazioan katea pribatuek gero eta
garrantzi handiagoa dute, publizitateak gero eta presentzia handiagoa du, eta
kapital internazionalak gero eta esku indartsuagoa erakusten du. Panorama zaila!