28

132

Natalia Alonso Gutierrez, Penélope García Laviana y Cristina Hernández López son la cara femenina de la nueva coperativa La Llume, una iniciativa que surdió comu una illusión y convirtióse en toa una rialida con Sidra L’Allume.

LLAGAR L ALLUME - ROILES. LLANGRÉU

29

Avientu 2014

Testu: Bea Fernández.Semeyes: Lujó.

Natalia, Penélope y Cristina

L’andar de la la coperativa La Llume escomienza en xunetu de 2013 y, na primavera de 2014, Sidra L’Allume yá ta na cai ¿Cómu surdió esta idega d’aniciar un llagar en forma coperativa?

Natalia: Nacho, Fuentes, Adrián y Coto diben años faciendo sidre nun llagar piquiñín y siempres falaben de la posibilidá d’entamar una coperativa. Yera una condición indispensable, que fore un proyeutu d’economía social vinculáu al nuesu territoriu, la cuenca El Nalón. Llegó la cris y trés d’ellos perdieron el trabayu, asina que decidieron convertir lo que siempres quinxeren nuna rialidá.

Penélope: En tiempos duros la xente entama a “poner a funcionar la tiesta” pa intentar buscase la vida. L’Allume xurde nun intentu por llabrase un futuru. Unos bonos collacios ficieronmos ver con proyeutos asemeyaos (cerveza Caleya) que l’autoemplegu yera posible; y qué meyor manera qu’intentalo con un productu tan direutamente conocíu polos compañeros que formen la coperativa, una coperativa siempres al marxe de la organización xerárquica empresarial y baxo la idega de trabayu n’equipu a un nivel de igualdá ente les presones que la integren.

Cristina: Los cuatro collacios teníen la ilusión desde va años de montar un llagar. Pasu ente pasu lo que namás paecía una illusión escomenzó a garrar forma y quinxemos intentalo. Que fuere en forma de coperativa toviémoslo nidio dende l’entamu, el sofitu a la economía social ye daqué importante pa toos nós.

¿Qué implicó pa cauna escomenzar a formar parte d’esta cooperativa y empecipiar a collaborar pa da-y movimientu a Sidra L´Allume?

Natalia: No presonal supunxo que la mio pareya, Coto, tornara a Asturies. Elli vivía dende diba 14 años en Madrid, onde trabayaba. L’aniciu de la coperativa vivíla con una illusión que sigue intauta. Anque la situación económica y la introduición nel mercáu d’una nuea marca son mui complicaes, les ganes de sacar L’Allume alantre pesen munchu más.

Penélope: Les muyeres de Sidra L’Allume formamos parte de la coperativa de forma indireuta. Toes tenemos el nuesu trabayu al marxe del proyeutu pero tamos ehí pa echar un gabitu en tolo que faiga falta. Pa min, collaborar con Sidra L’Allume, ye un suañu y lluchar pa sacalu alantre, a pesar de les torgues que topes pel camín, merez la pena. A la clas obrera nun se mos da ná fecho, pero ver que tas trabayando dalgo guapo con familia y amigos cerca, y que´l “frutu que colleches”va medrando poco a poco ye lo importante.

Cristina: Nel mio casu fizo que viniere a vivir a Asturies con tolos cambios qu’ello acarreta. Féxome atalantar meyor la cultura asturiana y la tradición de la sidre, dende la so ellaboración de manera artesano, fasta l’ambiente tan especial de los chigres. El fechu de formar parte d’una coperativa y trabayar d’igual a

igual ente amigos nun tien preciu, toos aportamos lo que podemos nos momentos bonos y malos.

Anque L´Allume ye una sidre mui nuevo yá se proclamó Sidre Más Prestosa en Xixón de Sidre del 2014 ¿Qué creyéis que fae a esta sidre diferente a les demás?

Natalia: Pa los que tamos dientru L’Allume, la diferencia va xuncía al propiu espíritu de la coperativa. Pero eso ye daqué que na barra’l chigre nun se nota. Lo que sí se nota, y tamién la diferencia, ye que namás s’usaren mazanes de les cuenques mineres d’El Nalón y El Caudal.

Penélope: Lo que la fae diferente ye´l fondu social y d’implicación cola rialidá que la representa. Pretente trabayar al llau d’otros colleutivos y asociaciones que lluchen por intereses xenerales del pueblu, coldu con coldu. Tamién sofita l’usu y la oficialidá de la llingua asturiana, y da puxu la produición llocal de la mazana. Amás ta perrica y nun da resaca (rises).

Cristina: Na mio opinión que seya una coperativa yá la fai especial. Que, amás, seya un llagar montáu dende cero por cuatro mozos, ensin sofitu, y que se maye namás mazana asturiano y de manera artesano, fai que muncha xente se interese por probalo y conocer el proyeutu.

El futuru paez prometedor, pero la cris sigue presente ¿Cómu ve’l futuru de Sidra L´Allume?

Natalia: La situación económica d’anguañu espanta al consumu pero yo creo qu’el consumu de sidre va acullá. Ye daqué mui enraigonao na sociedá, que va nel nuesu ADN. Si’l futuru de L’Allume dependiese de cómu s’intenten faer les coses dende la coperativa, de comu se curia tol procesu, nun tendríe duldes de que la cosa furrularíe. Pero, comu dices, la cris sigue perpresente ya introducir una nuea marca nel mercáu cuesta. Pesia ello soi optimista. El tiempu dirá

Penélope: Veo’l futuru de L’Allume y tamos toes y toos comu Geni y Velino (Sidra El Carbayu) xubilándomos nel llagar y les nueses fíesy fíos siguiendo cola tradición de llagareres (rises) , en serio: Nin lu veo, nin lu dexo de ver. El futuru ye inciertu, lo único que tenemos agora ye´l presente y vamos siguir nel presente, faciendo´l nuesu trabayu ca díi , lo meyor posible, pa que si el futuru nun llega o llega fechu un ciriu nun seya por que nun lo intentáremos.

Cristina: Ye perdifícile introducise nel mundiu la sidre, pero pasu ente pasu y con munchu trabayu faciéndomos un güecu, tenemos qu’agradecer el valor de munchos chigres d’apostar por una sidre tan nuevo y el sofitu de los consumidores que la piden, son ellos los que la faen xorrecer.