1  

 

 MULTIMEDIA  TESTUEN  ESTRATEGIA  LINGUISTIKOAK  

       

EUSKARAZKO  MM&D  HEDABIDE  BATEN  AZTERKETA  

     

                 

     

Ane  Pedruzo  Redondo      

Www.anepedru.blogspot.com    

   

2  

 

AURKIBIDEA:

1) EZAUGARRI OROKORRAK 3-6

a. Hedabide-mota 3 b. Eragileak, historia eta helburuak 3-4 d. Erabiltzaileak eta erabilera datuak 4-5 e. Hedabidearen lekua euskarazko komunikabideen mapan 5-6

2) DIMENTSIO SOZIOLINGUISTIKOA 6-8

a. Komunikaziorako baliabideak:hierarkia eta baliabideen arteko harremana 6 b. Lehentasunak, edukiak vs komunikazioa dinamika vs hizkuntza bera 6 d. Multimediaren, hipertestuaren eta elkarreraginaren ustiatze-maila 7-8 e. Funtzio soziolinguistikoa 8

3) DIMENTSIO PRAGMATIKO-FUNTZIONALA 8-11

a. Produktuaren funtzioak komunikatzeko estrategiak 8 b. Edukiak antolatzeko eta nabarmentzeko estrategiak 8-9 d. Nabigazioa eta elkarrekintza bideratzeko estrategiak 9 e. Eskaintza 9-11 f. Komunikazioaren helburuak eta komunikazioaren dinamika 11

4) TESTU-DIMENTSIOA 11-12

a. Testu-ereduak 11-12 b. Testuen txantiloiak 12 d. Testuaren eta elementu grafikoen arteko lotura 12

5) ESTILOA 12

a. Hizkuntza-eredua 12 b. Informazioaren kudeaketa 12 d. Hizkuntza-baliabideak 12 e. Hizkuntza-ereduaren egokitasuna 12

6) BIBLIOGRAFIA 13

3  

 

1) EZAUGARRI OROKORRAK:

a. Hedabide-mota:

Argia euskal proiektu editorial sendoa da, produktu anitz eskaintzen dituena. Zalantzarik gabe guztien artean garrantzitsuena Argia astekaria da, Euskal Herri mailan euskara hutsean argitaratzen den informazio orokorreko aldizkaria, irakurle gehien dituen euskarazko astekaria. Argia astekariak gaurkotasun gaien jarraipen zehatza egiten du. Elkarrizketa, kronika, iritzi artikulu, erreportajeen… bitartez gai ugari lantzen du kazetaritzako estilo desberdinak erabiliz, beti ere, publiko zabalaren interesak uztartuz. Gaztetasuna eta esperientzia batzen dituen kazetari talde batek egiten du Argia.

Izen handiko sinadurak eta kolaboratzaile-sare zabala eta espezializatua laguntzaile ditu gainera. Lasarte-Orian editatzen da eta Komunikazio Biziagoa S.A.L-ek argitaratzen du. 10.500 aleko tirada du.

Astekariarekin batera, hainbat gehigarri banatzen dira: “Larrun” pentsamenduzko aldizkaria hilero, sagardoaren gida eta posterra, euskarazko festa eta ekitaldiei buruzko dosier bereziak... Gainera urtean behin, otsailean zehazki, Euskal Kulturaren Urtekaria banatzen zaie harpidedunei. Urtekariak, urteko gertakizunen jarraipena eta analisia eta euskal kulturaren aurkibide orokorra eskaintzen ditu, guztira 8.000 erreferentzia baino gehiago.

Honez gain, bestelako produktuak ere eskaintzen dituzte, egutegi takoa esaterako, almanaka moduko egutegia alegia, eguneroko informazio baliagarria eta egunarekin lotutako gertaera bitxi eta interesgarriak dakartzana. Gainera, tarteka astekariak jorratzen dituen gaien inguruko liburuak argitaratzen dituzte, bidaiak, umorea, lokuzioak, gertuko historia... gai dutenak. Hau gutxi balitz, euskaraz gozatzeko eta aldi berean ikasteko mahai-jolasak ere sortu eta zabaltzen dituzte.

Paperezko formatua ardatz izanik, urteak joan dira Internet-en Argia.com ataria jaio zenetik. (1997. urtean abiarazi zuten Interneteko bertsioa Sareko Argia izenpean) Gaurkotasun gaiek ematen digute ongietorria bertan. Atariak eduki anitz biltzen du sail desberdinetan, informazioa, bereziak, multimedia edukiak, Argiako blogak, aisiarako proposamenak, zerbitzuak … Besteak beste “Astekaria” azpi-atalean, paperean argitaratutako azken aleak oso osorik daude eskuragarri, azken aleko gaiak banan-banan nabarmentzen dituztelarik. Aurrerago sakonduko dugu sareko Argiaren eskaintzan.

b. Eragileak, historia eta helburuak:

Argia-ren 90. urteurrena zela eta, Xabier Letona zuzendariak proiektu honen historiari heldu zion 2009. urteko lehen zenbakian. Bertan argitzen zuenez, 1919. urtean Iruñean

4  

 

kaputxinoek abiarazitako Zeruko Argia erlijio aldizkaria eta 1921ean Donostian jaiotako Argia informazio orokorreko astekariaren oinordekoa da gaur egungo Argia.

1936.ko Espainiako Guda zibilak eten egin zuen lehen aldiz bi aldizkarien jarduna. 50.eko hamarkadan Zeruko Argia berpizteko saiakerak egin ziren, ale gutxi batzuk baino ez argitaratuz. 1963.an ibilbide sendoari ekin zitzaion, kazetari belaunaldi berria aldizkarian idazten hasi zenean, kazetaritza-estiloa euskarara ekarriz. Edukien bilakaera itxuran ere islatu zen, kolorezko lehen argazkia argitaratuz, Lemoizko zentral nuklearra eraikitzeko lanen argazkia, hain zuzen ere.

1980.an kaputxinoek Zeruko Argiaren jabetza astekaria egiten zuten langileen esku utzi zuten, eta hauek, bide erlijiosoa guztiz baztertu zuten. Izena aldatu zioten eta ordutik, Argia bezala ezagutzen da. Orduko emaitzak izan ziren, halaber, Larrun pentsamendu aldizkaria, Susa argitaletxea, Argia eguna eta Argia sariak. 80.eko hamarkadaren erdialdetik Argiako kide gehienak, asteroko lanez gain, euskarazko egunkari bat sortzeko ekimenean sartu ziren buru-belarri, 1990.eko abenduan, Euskaldunon Egunkariaren lehen alea inprimatuz.

1997.an, astekari osoa koloretan inprimatzen hasi ziren, kostuak handiak izan arren, itxura moderno eta erakargarria eman nahian. Urte berean, hedatzen hasi berria zen Internetera saltoa egitea erabaki zuten, eduki guztiak doan emateko hautua egiten bakarretakoak izanik.

2006an Amets Arzallus eta Txomin Txuekak Boliviara egindako bidaia aitzakia hartuta, propio Interneten jartzeko egindako euskarazko lehen bideoak egin zituzten. Ordutik, jorratzen dute multimedia arloa.

Hasieran aipatu bezala 2009. urtean aldizkariaren 90. urteurrena ospatu zuten. 2010ean Argia.com webguneko blogetako eta multimedia kanaleko edukiak Creative Commons lizentziapean eskaintzen hasi ziren.

d.Erabiltzaileak eta erabilera-datuak:

Harpidedunen balorazio inkestatik ateratako datuen arabera, Argia/ko harpidedun gehienak banako partikularrak dira (%72). Harpidetza kolektiboei dagokienez, instituzioak, euskaltegiak, ikastetxeak eta zerbitzuak dira nagusi. Erabiltzaile gehienak goi-mailako ikasketadunak dira, euskaldun alfabetatuak eta egoera ekonomiko egonkorra dutenak. Gazte helduak dira, 25-55 urte bitartekoak batez ere. Nabarmentzekoa da nahiz eta harpidedun ez izan, gazte askok Argia irakurtzen duela.

Irakurleak fidelak dira, %83ak astero irakurtzen du astekaria. Batez beste, ordu erdi ematen du bakoitzak eginkizun honetan. Geografiari erreparatuz, Gipuzkoan irakurtzen da gehien, %44a zehazki. Bizkaian ere irakurle nahiko ditu (%32). Nafarroan, Araban eta Iparraldean portzentaia nabarmen egiten du behera.

5  

 

Erabilerari datuei helduz, paperezko Argia astekariak 7.500 harpidedun ditu eta 51.000 irakurle. Argia.com atariak aldiz, eguneko 5.000 sarrera erregistratu eta 25.000 orri zerbitzatzen ditu.

e.Hedabidearen lekua euskarazko komunikabideen mapan:

Gaur egun 400.000tik gora biztanlek kontsumitzen dituzte euskarazko hedabideak, 2008ko Eusko Jaurlaritzaren ikerketa baten arabera. Euskal hedabide gehienen helburua, Argiarena tartean, hiztun komunitateak bere burua euskaraz islatua ikusteko eskubidea bermatzea da. Sortzez euskaraz komunikatzeko nahia eta euskaldunari kazetaritza proiektu sendoak eskaintzeko borondatea du Argiak gaur egun helburu berdinari eusten diolarik. Helburu hori bermatzeko, hainbat euskarritan produktu desberdinak ekoizten ditu, paperean zein sarean alegia, “Euskara hedabideetan” txostenean (Euskararen Aholku Batzordea 2009) jasotzen den multiplataforma-estrategia bultzatzeko beharrari erantzunez. Txosten honen arabera gainera, Interneteko euskarazko mundua elikatuko duten eduki interesgarri eta kalitatezkoen ekoizpena bultzatu behar da eta Argia bultzatzaile horien artean nagusienetakoa

dugu, euskararen alde darabilen estrategia dela eta.

Hain zuzen ere, gaurkotasun gaien informazio zehatza eta argia eskaintzearekin batera euskara da komunikabide honen ardatza. Horren adierazle da, adibidez, Euskal Kulturaren Hari@ izeneko atala. Euskal kulturaren inguruko albisteak, adierazpenak eta iritziak jasotzen dituen buletin elektronikoa da, euskara berari espresuki tarte bat ere eskaintzen diona. Elementu multimedia anitz eta kalitate bikainekoak eskaintzen dituzte, besteak beste euskarazko film laburrak eta dokumentalak eskura jarriz. Blog interesgarriak ere biltzen dituzte, berariazko txokoa eskaintzen diote euskarazko publizitateari eta aisia euskaraz gozatzeko baliabideak proposatzen dituzte ( Ihesi Euskal Herriko gida, umorea, denbora- pasak, komikiak, Mantxut euskarazko esamoldeak …)

6  

 

Gainera zerbitzu anitz eskaintzen dituzte beti ere euskara oinarri, euskarazko produktuak erosteko denda ( jokoak, liburuak…) Euskal Herri mailako turismoa egiteko erraztasunak ( jatetxeen, nekazal etxeen… zerrendak), Gotzon Garatek bildutako atsotitzen web gunera sarbide zuzena, euskal idazle, liburu eta argitaletxeen berri ematen duen “Literaturaren kantoian” atala…

Euskal hedabide askorekin batera, Argiak ekarri garrantzitsua egiten dio euskal komunitateari. Honen harira, egunotan irakurritako eta zoritzarrez euskal hedabide asko kinka larrian aurkitzen direla gogoratzen digun artikuluari helduko diot. Laburbilduz, euskarazko hedabideei beste jauzi baterako ordua heldu zaiela aldarrikatzen du aipatutako testuak. Horretarako 60 euskal komunikabidek baino gehiagok, Argia barne, herri erakunde publikoen sostengu eta babes handiagoa errebindikatu dute bizi duten egoera latzari aurre egiteko. Ondo pentsatuta, euskal hedabideetan euskara bultzatzeko estrategiak zehaztu eta ezartzeko nahia eta horretarako baliabideak gero eta gehiago murriztea ez da koherenteegia ezta?

2) DIMENTSIO SOZIOLINGUISTIKOA:

a.Komunikaziorako baliabideak:

Argia-ren ardatza paperezko astekaria izanik, sareko Argiak ibilbide oparoa egin du kalitatezko produktua izatera helduz, oraindik ere bide luzea egiteke badu ere. Argia.com-en sail desberdinetan informazio anitz eskaintzen dute, horretarako baliabide desberdinak baliatuz. Testuak, audioak, bideoak, irudiak, Pdf-ak , blogak… baliabideak anitzak dira, baina guztien artean idatzizko testua nagusitzen da, izan ere, aurretik aipatu lez, paperezko edizioetako (astekaria, Larrun…) edukiak webgunera iraultzean oinarritzen da batez ere sareko Argia. Zentsu honetan, oraindik ez dute lortu eskura dituzten baliabideen uztartze egokia. Testua da protagonista eta bertan baliabide multimediak ez dira behar bezala integratzen. Esaterako bideoak testuen barnean beharrean sail bereizi batean aurkezten dira gehienetan, testuak paperezko edizioaren baldintzen arabera sortzen direlako. Dena den azkenaldian joera hau aldatzen ari da, multiplataforma izaera nagusituz, testuekin batera gero eta multimedia produktu gehiago sortzen ari baitira.

b.Lehentasunak: Edukiak vs komunikazio-dinamika vs hizkuntza bera

Informazio orokorreko aldizkaria izanik, Argiak landutako edukiak orotarikoak dira, profil desberdineko erabiltzaileei zuzenduak, baina hori bai denak euskaraz. Hizkuntzak baldintzatzen du beraz Argiaren jarduna. Orokorrean euskara Batua erabiltzen da beraz ez du muga geografikorik. Gainera hizkuntza-maila ez da altuegia, beraz, aldeak-alde, betiko euskaldunak zein euskara ikasten daudean arazorik gabe kontsumitu dezakete Argia. Darabilten komunikazio-dinamika norabide anitzekoa da erabiltzaileak edukiak jaso, iruzkindu, bidali, zabaldu… ditzakeelako. Zentsu honetan aipatzeko da Creative Commons lizentzia hautatu izana multimedia kanalean dauden Argiak sortutako edukientzako. Lizentzia honen pean dauden produktuak kopiatu, banatu, lan eratorriak sortu eta jendaurrean heda daitezke, beti ere lanaren egiletza aitortuz.

7  

 

c. Multimediaren, hipertestuaren eta elkarreraginaren ustiatze-maila:

Esan berri bezala, sareko Argiak une oro bilatzen du elkarreragina. Izena eta e-posta emanez berri guztiak iruzkindu daitezke. E-postaz ere hirugarrenei bidaltzeko aukera dago, baita inprimatu, alde edo kontra bozkatu eta Interneten zabaldu ere, Facebook, Twiter, Digg eta Delicious bitartez. Gainera RSS jariora eta “Hari@” buletinera doan harpidetzeko aukera dago (Azken hau egunero 2300 harpidedunei bidaltzen zaie).

Nire ustez, “Zerbitzuak” eta “Gunea” ataletan lantzen da bereziki interakzioa. Lehengoan euskal kulturaren inguruko informazioaren bilatzailea dago, sarean dauden ziberkomunikabideetara sarbide zuzena eskaintzen dute “Kioskoa” atalean, “Dendan” euskal jokoak, liburuak,

artelanak… eros daitezke, baita euskal makilak ere, euskal kultura zabaltzearen alde egiten duten ahaleginaren beste adierazle bat. “Gunea” atalak harpidedunen elkar-ekintza bilatzen da. Atalaren aurkezpen bera horren adierazle da; “Egitasmo honen helburua zure eta gure arteko komunikazioan urrats berriak ematea da” irakur daiteke. Bertan iruzkinak egiteko tartea, astero egiten dituzten zozketetan parte hartzeko aukera, harpidedunei bereziki zuzendutako albisteak… aurki daitezke.

Sareko interakzioa gainera aurrez-aurreko harremanarekin uztartzen dute. Esaterako, 2010. urteko Durangoko azokan izan ziren, urtero bezala, eta bertan erosketak egitearen truke zozketa batean parte hartzeko aukera eskaintzen zuten. Sarituen zerrenda web orrialdean eskegi zuten. Horrelako ekintzekin interakzioa indartzen da eta jendea web orrialdea ezagutzera animatzen dutela iruditzen zait.

Hipertestuari dagokionez, ahal baino gutxiago aprobetxatzen dutela esango nuke. Hipertestuak eskaintzen dituen oinarrizko ekintzak egitea dago, alegia, nabarmendutako lerro-buruetan klikatu albiste osoa ikusteko, Argiak berak lantzen ez dituen gaien berezko bertsiora joan, Argiak gomendatutako web guneetara zuzeneko sarbidea izan ( Mantxut, Atsotitzak…)… Publizitatea atalean hipertestuak berebiziko garrantzia duela esango nuke. Eskaintza baina ez doa askoz haratago. Oso gutxitan topatzen da informazioa osotzeko edo audio edo bideo

8  

 

batera jauzi egiteko testuan integratutako estekarik eta honek nabarmen aberastuko luke Argiaren eskaintza.

e.Funtzio soziolinguistikoa:

Jadanik aipatu bezala Argia publiko zabal batengana iristen da, beraz orotariko pertsonen gustuko gaiak lantzen dituzte, horien artean euskara eta euskal kulturarekin erlazionatutakoei berebiziko garrantzia ematen zaielarik. Erabilera datuetan islatu bezala, gazte-helduak dira Argia-ren kontsumitzaile potentzialak, gazteak gero eta gehiago direlarik. Horren jakitun izanik, gazteak erakartzeko ahalegina egiten dutela ikusten , batez ere “Aisia” atalean, bertan publiko gazteari zuzendutako edukiak biltzen baititzute, komikiak, denbora-pasak, txisteak, bidai-txango proposamenak… Gainera, Argiako lan-taldea oro har gaztea da eta horrek eragin zuzena du edukien hautaketan, trataeran, ikuspegian…

3) DIMENTSIO PRAGMATIKO-FUNTZIONALA:

a.Funtzioak, komunikatzeko estrategiak:

Argiak komunikazio-eredu informatibo eta transakzionala du. Gaurkotasun gaien inguruan informatzea du xede, oinarri euskaldun sendo batetik abiatuta. Bestetik interakzioa bilatzen du une oro erabiltzaileen ase-betetzearen mesederako.

Argiak multimediaren aldeko apustu garbia egin duela bistan dago. Hain zuzen ere, Argia.com-en multimedia atal bereizia dago. Bertan bideoak, film laburrak, diaporamak eta dokumentalak ikus daitezke, argazki galeria zabal batean murgildu eta ekitaldi jakin batzuen jarraipen zehatza egin. Komunikabide honen apustu estrategikoa da multimedia eta honen adierazle argia da azken asteetan sortutako “Beranduegi” azpi-atal berria. Web telebista moduko bat da, non besteak beste, albistegi ironikoa, lehiaketak, elkarrizketak… ematen dituzten. Hau gutxi balitz, Argiak sortutako bideoetara harpidetzeko aukera ematen dute, Youtube bertatik ala Miro edo Itunes programak instalatuz. Vidcast kontzeptu berriaz mintzo dira, zer den, nola erabiltzen den eta Argian nola eskaintzen duten azalduta. Horrelakoekin, Argia teknologia berrietara guztiz egokitutako medio bat dela argi gelditzen da.

Dena den, multimedia errekurtsoak atal berezitu batean eskaintzea baino testuetan integratu beharko liratekeela berriz diot.

b.Edukiak antolatzeko eta nabarmentzeko estrategiak:

Edukien aurkezpena oso txukuna da, gauzak erraz aurki daitezke, atalak oso ondo bereiziak daude… Honen adierazle da adibidez atalen bereizketa errazteko koloreekin darabilten jokoa. Normalean atal nagusiak grisez aurkezten zaizkigu baina arratoia atal jakin baten gainean jartzen dugunean atal horren izena eta bertako azpi-atalen zerrenda grisetik beltzera aldatzen dira, identifikazioa erraztuz.

Honek guztiak edukien bilaketa izugarri errazten du eta euskara maila eskasa dutenentzat informaziora heltzeko oso baliagarria da. Gainera, galduta ibiltzearen sentsazioa

9  

 

izatekotan zuzenean bilaketa aurreratua egiteko aukera dago. Honek guztiak, baliabide eta edukien antolaketa egituratuak alegia, kontrol-sentsazioa ematen dio erabiltzaileari ondorioz konfiantza-maila areagotuz.

Dena den, hobe zezaketen alderdi bat dago. Atal batzuetan, astekaria, Larrun, net hurbil, bidaia kanalak… sartzean atariko orrialde nagusiko egitura mantentzen da eta bertatik beste atal batzuk zuzenean hautatzeko aukera dago. Argia sariak, urtekaria, oporren kantoia, gunea… eta beste hainbat ataletan sartuz gero ordea, egitura ez dator bat eta halabeharrez atzera jo behar da edo “itzuli argia.com-era” esteka sakatu nabigatzen jarraitzeko.

d.Nabigazioa eta elkarrekintza bideratzeko estrategiak

Salbuespenak salbuespen, edukiak modu argian identifikatuta egoteak nabigazioa azkarra izatea bermatzen du. Bestetik sareko Argiak elkarrekintza sustatzeko ahalegin nabaria egiten duela aipatu dugu dagoeneko baina oraingoan interaktibotasuna mailaz-maila aztertuko dugu. Edukien hautatzeari dagokionez, Argia-ko erabiltzaileek une oro aukeratu dezakete zer irakurri, ikusi, bilatu… atariaren antolaketak hautaketa errazten baitu. Parte-hartzeari dagokionez, erabiltzaileak bide desberdinak har ditzake jasotako informazioaren partaide sentitzeko, iruzkinak egin, sare sozialen bitartez zabaldu… Sormenarekin zerikusia duen elkarrekintza maila da eskasena, ez baitago sormenarentzako leku handirik. “Umorea” azpi-atalean txisteak bidaltzea dago (nahiz eta atal hau ez den oso aktiboa) eta zenbait lehiaketetan irudimenari lekua egiten zaio, baino hortaz gain ezer gutxi gehiago dago.

e.Eskaintza

Jadanik azaldu bezala Argia.com-eko edukiak atal desberdinetan banatzen dira, hauetan aldi berean azpi-atalak daudelarik. Jarraian banan-banan aztertuko ditugu:

• “INFORMAZIOA”: Logikoa denez atal honetan informazio orokorreko edukiak biltzen dituzte. Lehenik eta behin “Astekaria” azpi-atala dago, non paperezko edizioan argitaratutako edukiak aldaketa nabarmenik gabe eskaintzen dituzten. “Hari@-n” euskal kulturaren inguruko albisteak, adierazpenak eta iritziak jasotzen dituzte, bai komunikabide beretik zein beste hedabide batzuetatik. “Larrun”-en hilero argitaratzen duten paperezko edizioaren edukiak aurkituko ditugu. “Sarekadan” asteburuetan web-gunean argitaratutako gaiak daude eta “Net hurbil”-en Peio Zubiria kazetariaren testuak biltzen dituzte. Azkenik “Urtekarian” urtero argitaratzen den euskal kulturaren egutegiko edukiak atalka eskuratzea dago.

• “BEREZIAK”: Atal honetan komunikabide beraren inguruko ekintza bereziak eta euskal gizartearentzat esanguratsuak diren hainbat gertaera lantzen dituzte. “Bidaia kanalak” deritzon azpiatalean munduko txoko desberdinetako kronikak biltzen dituzte, Afganistanekoak, Eskoziakoak, Ipar Irlandakoa… “Argia sariak”-en izenak berak dioen bezala Argiak urtero euskarazko komunikazioan nabarmendu diren pertsona, talde, enpresa, profesional edo produktuei banatzen dien sarien berri ematen dute. Honez gain, sagardoari bereziki eskainitako azpiatala ere badago, euskal kultura

10  

 

nabarmentzearen alde egindako apustuaren beste seinale bat. “Gure mendea” izeneko atalean, euskal kulturan azken 100 urtetan nabarmendutako gertaerak eta pertsonaiak biltzen dituzte, hemeroteka, gure protagonistak edo publizitatea bezalako azpiatalen bitartez. Argiako historiaren azken 90 urteei errepasoa ere egiten diote, “90 urte” atalean.Donostiako musika hamabostaldia eta zinemaldiari bereziki atal bana eskaintzen diote ere. Ekimen hauek gertatzen ari diren momentuan eskaintzea ondo dago, baina behin igarota web orrialdetik kentzea komeniko litzateke.

• “MULTIMEDIA”: Atal honetan multimedia produktu desberdinak jartzen dituzte erabiltzaileen eskura. Atal honetan bildutakoa aurretik azalduta dagoenez, errepikagarria litzateke gehiago sakontzea.

• “BLOGAK”: Atal honetan erredakzio mahaiko kideen (Mikel Asurmendi, Lander Arbelaitz, Xabier Letona, Eli Pombo..) blogak bisitatzeko aukera dago baita zenbait blog pertsonal ere (Estitxu Eizagirrerena, Gorka Bereziartuarena…).

• “AISIA”: Hemen aisiarako proposamen desberdinak egiten dituzte. “Ihesi” paperezko astekariko Ihesi atalean argitaratutako ibilbideen sailkapena da eta bere baitan Euskal Herriko Gida dute, nahiz eta hau beste azpi-atal bat bezala ere eskaintzen duten. “Mantxut” Argiak eta Zazpiak Batmanek elkarlanean sortutako euskal esamoldeen ataria da. “Umorea”ren tartean txisteak bidaltzeko aukera ematen dute baina ez du ematen arrakasta handirik duenik. Honez gain, umorearen munduan erreferentzia diren pertsona, elkarte edo erakundeen web-guneetara sarbide zuzena eskaintzen dute, Tmeo, Faemino y Cansado edo Leo Bassi-ren atariak besteak beste. “Denbora-pasak”en klik eginez gero euskarazko gurutzegramak eta letrazopak egin daitezke. Azkenik “Winston Jr.” atalean pertsonai honen abenturak jasotzen dituzten komikiekin goza daiteke.

• “ZERBITZUAK”: Sail honetan lehenik eta behin “Euskal kulturaren aurkibidea”rekin egingo dugu topo, kultur jardueren eta taldeen inguruko bilaketak egiteko gunea. “Kioskoan” hedabide ugariren web guneetara jauzi egitea dugu eta “Dendan” euskal produktuak erosteko parada, mahai jolasak, liburuak.. baita euskal kulturaren ikur diren euskal makilak ere. Gotzon Garatek bildutako atsotitzak aurkituko ditugu izen bereko sailean. “Oporren kantoian” Araba, Bizkaia, Gipuzkoa, Nafarroa eta Catalunyako jatetxe eta ostatuen zerrendak

11  

 

topatuko ditugu eta “Ihesi” saileko ibilbideetara zuzenean sartu ahalko gara. “Literaturaren kantoian” euskal idazle, liburu eta argitaletxeen berri izango dugu.

• “GUNEA”: Atal hau bi zatitan banatuta dago , orokorra eta pribatua. Jada azaldu bezala harpidedunei zuzenduriko gunea da non harpidedun izateak ekarritako onuren berri ematen den. Gune pribatuan sartzeko harpideduna izatea beharrezkoa da.

• “PUBLIZITATEA”: Publizitate agentzia, enpresa eta publizitatea jarri nahi duten norbanakoei zuzendutako atala da. Bertan publizitatea jartzeko prezioak, baldintzak… daude ikusgai. Publizitatea idatzizko astekarian, Larrun eta urtekarian eta Argia.com-en jar daiteke.

• “HARPIDETZAK”: Argiako harpidetzaren abantailak, baldintzak… jasotzen dira honetan.

f. Komunikazioaren helburuak eta komunikazioaren dinamika:

Argiaren komunikazioa helburua orotariko gaiak euskaraz eta euskal gizartetik euskal gizarterako eskaintzea da. Horretarako norabide anitzeko komunikazio dinamika darabilte. Argiak oro har komunikazio-eredu dinamiko, berritzaile eta erakargarria eskaintzen duela iruditzen zait. Argiak oso gertutik jarraitu ditu teknologia berriek komunikazioaren alorrean zabaldu dituzten aukerak, multimedia errekurtsoak eraginkortasunez baliatzen dituelarik. Diseinu dinamikoa eskaintzen du, ordenatua, txukuna eta bizia, atalak oso ondo bereizten dira, ez dago kolore gehiegirik… Kalitatezko produktua dugu Argia gaurkotasuna eta euskara bikaintasunez uztartzen dituena.

4) TESTU-DIMENTSIOA:

a.Testu-ereduak:

Argia.com-eko testu gehienak paperezko edizioetatik hartutakoak dira beraz paperezko testugintzari dagozkion ezaugarriak dituzte interneten aurki daitezkeen testu askok.  Horregatik euren egitura gehienetan iraulitako piramidearena da, alegia, izenburua, sarreratxoa eta testuaren gorputza.

Askotariko gaiak lantzen dituzte bertan, batez ere erreportaje eta artikuluak nagusitzen direlarik. Paperezko formatua oinarri izanik hipermediaren ikuspegi mugatua dute, ez dute web-erako aurre-ikusitako testu eredurik jarraitzen. Dena den, gogoratu beharra dago azken aldian hipermedialtasuna hobetzeko aurrera pausu nabarmenak eman dituztela.

12  

 

b.Testuen txantiloiak:

Txantiloiak desberdinak dira albiste batetik bestera. Genero desberdinak lantzen dituzte, artikuluak, erreportajeak eta elkarrizketak nagusizten direlarik. Testu zatien arteko lotura lineala da. Testuen diseinuari dagokionez, zertxobait hobetu litezke testuak justifikaturik aurkeztuz, itxura txukunagoa izango luketelarik.

d.Testuaren eta elementu grafikoen arteko lotura:

Argia.com-eko testu gehienak, argazki edo irudi batek lagunduta aurkezten zaizkigu. Multimedia errekurtsoak ordea nahiko eskasak dira testuen baitan, behin eta berriro esan bezala, produktu multimediak gehienetan atal bereizi batean daude bilduak eta ez testuetan integraturik.

5) ESTILOA:

a.Hizkuntza-eredua:

Argia euskara hutsez argitaratutako produktua da eta orokorrean euskara batuaren aldeko hautua egiten du, nahiz eta tarteka euskalkian idazten duten, berrien kokagune geografikoaren arabera. Hizkuntza-eredu arina darabil eta edukiak era serioan landuta badaude ere oso hurbilak suertatzen dira. Euskaldun guztiek, betiko euskaldunak, euskaldun berriak eta euskalduntzen daudenak, ulertzeko moduko hizkera estandarra nagusitzen da. Adierazgarria iruditu zait baina “Publizitatea” atalean informazioa euskara, erdaraz eta frantsesez eskuratzeko aukera ematen dutela eta “ Euskal kulturaren aurkibidean” bilaketa aipatutako hiru hizkuntzetan baita ingelesez ere egin daitekeela. Euskal kultura eta euskara bera Euskal Herritik at ezagutarazteko aukerak zabaltzen dituzte horrela.

b.Informazioaren kudeaketa:

Informazioa argitasunez lantzen da, esaldi ulergarriak eraikiz. Testuak koherenteak dira eta harmonia mantentzen dute atariko gainontzeko elementuekin, egitura orokorrarekin alegia. Testuekin batera doazen elementu multimediak (argazkiak eta irudiak %90ean) informazioa aberasten eta osotzen dute.

d.Hizkuntza- baliabideak:

Argia.com-eko edukiak publiko zabal bati iristeko modukoak dira, era argi, zehatz eta funtzionalean argitaratzen baitira. Darabilten euskara oro har ez da korapilatsua, esaldi luze eta ulertezin gutxi aurkitzen ditugu eta informazioa era zuzen eta zehatzean zabaltzen dute, adarretatik joan gabe.

e.Hizkuntza-ereduaren egokitasuna:

Argiak darabilen hizkuntza-eredua egokia da oso dituen helburu komunikatiboak eta hartzaileak kontuan hartuz.

13  

 

6) BIBLIOGRAFIA:

• www.argia.com

• www.wikipedia.org

• “Euskara hedabideetan” txostena (Euskararen Aholku Batzordea 2009)

• Berriako “Euskarazko hedabideei beste jauzi baterako ordua heldu zaie” artikulua

.