espaÑa no franquismo - wordpress.com€¦ · espaÑa no franquismo selección documental a partir...
TRANSCRIPT
1
ESPAÑA NO FRANQUISMO
Selección documental a partir da realizada por Xosé Alfeirán, Ana Brea e Ana Romero
ÍNDICE
1. Valoracións sobre Franco
2. Foi fascista o franquismo?
3. Limitacións do poder de Franco
4. Exército e Igrexa, piares do réxime
5. Catolicismo e superstición na España franquista
6. Franco fundamenta o seu réxime
7. Valores dos currículos escolares do novo réxime
8. Franco, xefe do Movemento Nacional
9. Implantación dunha política autárquica
10. Intervencionismo estatal: creación do Instituto Nacional de Industria (INI)
11. As relacións co Eixe na Segunda Guerra Mundial
12. A lei de referendo franquista
13. Pervivencia da guerrilla antifranquista
14. Foucellas
15. Adhesión popular a Franco e ao seu réxime
16. A ONU condena ao réxime de Franco
17. Protestas obreiras e represión
18. Relacións co Vaticano: o Concordato de 1953
19. O convenio cos Estados Unidos
20. Os inicios da política liberalizadora: o Plano de Estabilización de 1959
21. Protesta do clero vasco
22. A organización sindical franquista
23. Evolución política do conde de Barcelona
24. Valoracións da Lei Orgánica do Estado franquista
25. Construción dos principais encoros galegos (sobre datos de X. S. Murias)
26. A loita armada de ETA
27. Protesta con música
28. Franco resolve a cuestión sucesoria en 1969
2
29. Xoán Carlos, o fillo que non tivo Franco?
30. Atado e ben atado
31. Nacemento e características das Comisións Obreiras (CC OO)
32. Os sucesos do 10 de marzo de 1972 en Ferrol
33. A organización do atentado contra Carrero Blanco
34. O espírito do 12 de febreiro
35. Fundación da UMD
36. Ideoloxía e propostas de Tácito
37. A cuestión do Sahara
38. Os acordos de Madrid
39. A imperiosa necesidade de cambio
1. Valoracións sobre Franco
Franco foi unha personalidade complexa valorada de modo moi
diferente: desde as visións panexíricas dos seus partidarios, nas que se lle
considera como o salvador da patria en perigo, elixido por Deus para
levar a cabo esta excelsa misión, ás apreciacións dos seus opositores, que
non lle perdoaban a falta de liberdades, a férrea censura, a prohibición do
pluralismo político e a dura represión que exerceu. Moitos coinciden en
resaltar, como trazo básico do seu carácter, a lentitude en tomar
decisións.
Militar de brillantísima historia, adornado das más excelentes virtudes da raza, o noso
Caudillo foi un don da Providencia para reunir todas as vontades e conducir á patria
de triunfo en triunfo ata rescatala das garras do marxismo e poñela no camiño da súa
futura grandeza.
Historia de España [Libro de texto do Bacharelato]. 1949 [cast.]
Home de breve estatura, discurso monótono e voz afrautada, intentou ser histriónico
sen alcanzar os niveis de Hitler e Mussolini, aos que seguramente superou en
hipocrisía e capacidade insidiosa (...). Porque Franco, o Caudillo, exerceu como un
tirano ao que nunca tremeu o pulso para asinar miles de execucións no nome de Deus e
da patria. Dise que tivo "sorte". É certo (...), pero tamén "soubo" ter sorte. Desde 1926,
despois do seu ascenso ao xeneralato, Franco, o dubitativo, soubo eliminar da súa vida
un factor perigoso: a presa.
Bernardo MUNIESA. Ditadura e monarquía en España. 1996 [cast.]
2. Foi fascista o franquismo?
Existe aínda un debate entre analistas e historiadores sobre a natureza
política do franquismo. En sentido estrito, o franquismo non se pode
cualificar de fascista, aínda que asuma moitos postulados do fascismo
procedentes da Falanxe e de Xosé Antonio Primo de Rivera.
3
Era Franco un fascista? A resposta é negativa pese a toda a retórica da pseudo-
Falanxe. O seu réxime foi unha ditadura militar? Franco afastou aos xenerais da
política, xa fose por destitución ou prebenda, e formalmente contaba cunhas Leis
Fundamentais que limitaban en teoría o seu poder de xefe de Estado. Agora ben, un
exército formado por Franco e combatente con el foi sempre, en último extremo, a alma
disuasoria que o Xeneralísimo conservaba coidadosamente.
Existía en España o férreo poder dun partido único como o da Alemaña nazi ou a Rusia
soviética? O Movemento Nacional era na práctica inexistente, e o poder intermedio
entre Franco e España repartíano as "familias" de monárquicos, falanxistas,
democristiáns, Opus Dei, tradicionalistas... e banqueiros.
Impuxo Franco unha ideoloxía coherente e mesiánica aos españois e perseguiu a quen
non a acatase? En absoluto. Franco non tiña ideoloxía algunha e non impuxo nada.
Limitouse só a que ninguén puidese expresar en voz alta ou puxese en práctica o que
pensaba se iso podía prexudicarlle a el na súa única convicción: conservar o poder
alcanzado tras unha cruenta guerra civil de tres anos.
Xosé Antonio GONZALEZ CASANOVA. O franquismo a dez anos vista, Cuadernos
de Historia 16. 1985 [cast.]
3. Limitacións do poder de Franco
Franco exerceu un poder ditatorial, pero, aínda que as limitacións legais
ao seu poder eran moi poucas, existían certas limitacións derivadas da
propia formación do ditador como católico, monárquico, conservador e
anticomunista.
O poder omnímodo de Franco, como toda realidade humana, tiña naturalmente uns
límites que non podía traspasar. (...) Eses límites, ao meu xuízo, eran tres, e nada máis
que tres.
O primeiro era o catolicismo, que convertera a Guerra Civil en cruzada, con todas as
consecuencias (...). Franco cedía no que a Igrexa consideraba indispensable e, a
cambio do que non lle deixaba facer, inundábaa de privilexios e vantaxes de todo tipo.
(...)
A segunda gran limitación proviña do mundo exterior. Era a que impoñía a gran
potencia que en cada momento capitanease o anticomunismo no mundo. Ao principio
foron os fascistas, con Hitler e Mussolini á cabeza. (...)
A terceira limitación ao poder de Franco é a que eu chamo o "testamento de Afonso
XIII". O caudillo non se imaxinaba nun libro de historia aliñado cos presidentes Alcalá
Zamora e Azaña e o que viñese despois, nin reducido á serie dos caudillos militares:
Espartero, Narváez, O'Donnell, Prim, Serrano e Primo de Rivera. El pensaba de si á
"maneira grande". Afonso XII, Afonso XIII, unha paréntese (o republicano), Franco e
logo o Xoán que tocase. Esa si era, para Franco, unha lista de nomes razoable. Nunca
tomou en serio ningunha outra fórmula sucesoria (...) especialmente desde que decidiu,
en 1945, se non foi xa en 1943, impedir que o conde de Barcelona fose rei de España.
Antón FONTÁN. Os corenta anos de Franco no poder. 1984 [cast.]
4
4. Catolicismo e superstición na España franquista
A Igrexa e a relixión católica estiveron intimamente ligadas e
sustentaron ao réxime franquista. Os seus principios e normas morais
impuxéronse obrigatoriamente a toda a sociedade. Este catolicismo
oficial e a ausencia de crítica intelectual propiciou a extensión dunha
corrente de credulidade milagreira, relacionada coas reliquias de santos, e
de maniqueísmo relixioso considerando a España e ás súas autoridades
como os predilectos de Deus para impoñer o ben na sociedade.
26 de xaneiro de 1937. Dona Carme [Polo, esposa de Franco] non cabe en si de gozo.
Nunha maleta esquecida polo gobernador republicano de Málaga -parece que era un
home moi relixioso- encontrouse, envolta en papel de periódico, unha reliquia famosa
en Andalucía. Trátase nada menos que do brazo incorrupto de santa Tareixa, que fora
roubado nun convento de Ronda pertencente ás carmelitas. É un obxecto de aspecto
verdadeiramente repugnante que, segundo din, operou xa varios milagres.
Dona Carme instalou a reliquia encima da cómoda da súa habitación, para poder vela
desde a cama. O bispo de Málaga reclamou o brazo da santa, pero dona Carme
negouse en redondo a facelo. Coaccionado polo cardeal Gomá, un acérrimo fanático
do Xeneralísimo, o bispo malagueño preferiu esquecerse do asunto.
Xosé Luís de VILALLONGA. O sabre do Caudillo. 1997 [cast.]
Era un país no que as calamitosas circunstancias que estaba atravesando, a negación
da función crítica e o menosprezo do mester intelectual, cualificado de subversivo e de
demoledor desde a inmobilidade duns dogmas políticos e relixiosos, propiciaran as
máis irracionais esperanzas. Unha onda de superstición milagreira e prodixiosa
dominaba os sentimentos dunha comunidade na que raro era o día en que desde os
medios de comunicación non se divulgaba algún portento ou marabilla. O sobrenatural
mesturábase na vida cotiá sen asombro nin control, encarnando nunha credulidade
popular que, no seu difícil existir, aferrábase ás máis insólitas crenzas en espera do
milagre, do invento ou do descubrimento salvador. (...)
Enmarcada nesta atmosfera dunha credulidade raiana no fetichismo, raro era el día en
que non se aventaba a noticia da chegada a España dalgunha venerada reliquia
destinada á inevitable xira procesional. O pé de san Xosé de Calasanz, o dedo de san
Xoán de Deus, o brazo de san Francisco Xabier ou a costela de san Francisco de Régis
eran paseados entre o fervor dos crentes nada alarmados ante aquela profusión de
restos. (...) Como se dunha comunidade primitiva se tratase, a presenza do espírito
maligno era un feito que se estaba disposto a aceptar como cousa natural, dado o
maniqueísmo que se profesaba. O ben e o mal recoñecíanse como forzas benéficas ou
maléficas cun poder que gravitaba sobre un mundo dividido en bos e malos. O
almirante Carrero fora moi explícito ao proclamar: "Ese é precisamente o problema
español: España quere implantar o ben, as forzas do mal desatadas polo mundo tratan
de impedirllo". E Gabriel Arias Salgado, o primeiro ministro de Información e Turismo
do réxime de Franco, declaraba moi seriamente en 1952: "Stalin viaxa con frecuencia e
non se dan explicacións acerca de a onde vai. Pero nós sabémolo. Vaise á República de
5
Acerbaixán e alí, nun pozo abandonado das perforacións petrolíferas, aparéceselle o
Diaño que xurde das profundidades da Terra. Stalin recibe as instrucións diabólicas
sobre canto hai que facer en política. Ségueas ao pé da letra e isto explica os seus
éxitos pasaxeiros.
Rafael ABELLA. A vida cotiá baixo o réxime de Franco. 1996 [cast.]
5. Franco fundamenta o seu réxime
O franquismo foi unha ditadura que asumiu os postulados básicos da
dereita máis conservadora e do fascismo da Falanxe. Franco condensaba,
en moitos dos seus discursos, os fundamentos ideolóxicos do réxime:
mesianismo, catolicismo, tradición, unidade, orde, disciplina, así como a
crítica contra os seus principais inimigos e de España: o liberalismo e o
liberalismo.
Españois:
Ao celebrarse este día a conmemoración do Alzamento Nacional, non glorificamos só
un feito que interesa á vida de España. Trátase dunha fase da historia do mundo que
coroa o proceso da revolución bolxevique que, tendo por escenario o noso solar,
correspóndenos ser os paladíns dunha fe, unha civilización e unha cultura, gravemente
ameazadas polos principios vermello-comunistas (...). Poucas persoas en España se
deran conta ata entón dos perigos que nos ameazaban (...). Sinalo con isto a Xosé
Antonio Primo de Rivera, mártir glorioso da nosa Cruzada (...).
Á irresponsabilidade política dos partidos liberais, sucede a unidade da nosa cruzada,
organicamente constituída; un Estado neutro e sen ideais, é substituído polo misional e
totalitario, que orienta ao pobo sinalándolle o camiño (...). Por iso, aos que perseveren
nos vicios do vello sistema, apartarémolos: que a España "unida e en orde", a que tivo
o xugo e as frechas por emblema, a dun Caudillo responsable e de carácter misional, é
a España grande das nosas tradicións de características netamente españolas, que hoxe
adoptan os pobos que coidan do seu futuro imperial (...). Hai que soldar ao pobo,
dividido polos partidos; hai que unir medio século de separacións; hai que borrar os
prexuízos da loita de clases; (...) hai que elevar os principios do Movemento (...) e por
iso, para salvar a España, temos que poñer man dura sobre os desvíos da xuventude, se
alguén se apartase da liña marcada (...).
Españois todos: Arriba España! Viva España!
Francisco FRANCO. Discurso [de conmemoración do Alzamento Nacional]. 18-7-1938
[cast.]
Camaradas: (...)
A nosa doutrina persigue o imperio de Deus, a grandeza da patria o ben xeral dos
españois, ou o que é o mesmo: unión estreita do nacional co social baixo o imperio do
espiritual. (...) Porque España é a nación predilecta de Deus; os seus grandes servizos á
Igrexa, por ningún outro pobo igualados, non podían quedar sen recompensa; por iso, en
medio das grandes crises, non lle faltou a súa poderosa axuda. (...) Nós non condenamos o
marxismo nin o comunismo por canto teñen de aspiracións no social, que non só
6
compartimos, senón que superamos, senón por canto teñen de antinacional, de
materialista e de falso. (...) A Falanxe xa sabedes que está inspirada no castrense e no
monástico, e tanto na milicia de Deus como na da patria, ascendese só polo camiño da
virtude.
Francisco FRANCO. Discurso [á Fronte de Xuventudes]. 4-10-1942 [cast.]
6. Implantación dunha política autárquica
A política económica franquista da posguerra, inspirada no fascismo,
caracterizouse por tratar de conseguir unha economía autosuficiente e
autárquica, mediante un forte intervencionismo estatal e a protección da
produción nacional da competencia exterior.
O problema máis grave que presenta a economía española é o desnivel da nosa balanza
de pagos co estranxeiro (...). Este desnivel permanente e visible do noso comercio en
todo o que vai de século, coa única excepción dos cinco anos nos que o subministro ás
nacións en guerra ofrecen superávit accidental, resulta de tal gravidade para a nosa
economía, que suprimilo ten que constituír a directriz principal da nosa política
económica, xa que, doutro modo, produciríase o fenómeno de que a riqueza nacional
continuase esgotándose nesta sangría solta de centenares de millóns que anualmente
marcha a vigorizar a economía dos países exportadores (...).
Imponse a política comercial no exterior:
1. Suprimir as importacións que non sexan indispensables.
2. Reducir aquelas outras que poidan ter un substitutivo ou permitan esta redución.
3. Implantación de novas industrias e regos que nos faciliten os produtos que hoxe
importamos.
4. Intensificar as nosas exportacións, incluso con primas.
5. Estipular tratados comerciais que obriguen a comprarnos aos que nos venden os
seus produtos pero hoxe non nos compran a nós ou non o fan en proporción notoria.
Francisco FRANCO. Discurso. 9-10-1939 [cast.]
7. As relacións co Eixe na Segunda Guerra Mundial
A España franquista mantivo nos comezos da Segunda Guerra Mundial
estreitas relacións cos países do Eixe, dos que recibira importantes
axudas na Guerra Civil. Froito desa colaboración foi o envío de forzas
militares para combater na fronte rusa, aínda que oficialmente declarouse
non belixerante. A partir de 1943, coas vitorias aliadas, as relacións co
Eixe fixéronse máis frías, evolucionando cara á neutralidade, no intento
de evitar as posibles represalias dos aliados.
Os gobernos italiano, alemán e español mostráronse conformes no seguinte: (...)
3. Polo presente Protocolo declara España a súa conformidade ao Tratado de Alianza
e Amizade asinado entre Italia e Alemaña (...).
4. En cumprimento das súas obrigas como aliada, España intervirá na actual guerra a
carón das potencias do Eixe contra Inglaterra, unha vez que a teñan provisto da axuda
militar necesaria para a súa preparación militar, no momento en que se fixe de común
7
acordo polas tres Potencias, tomando en conta os preparativos militares. Alemaña
garantirá a España axuda económica, facilitándolle alimentos e materias primas, así
como a facerse cargo das necesidades do pobo español e das necesidades da guerra.
5. Ademais da incorporación de Xibraltar a España, as potencias do Eixe están
dispostas a considerar –de acordo cunha determinación conxunta, que deberá
establecerse en África e que se fixará nos tratados de paz despois da derrota de
Inglaterra- que España reciba territorios en África en extensión semellante na que
Francia poida ser compensada (...).
6. O presente protocolo terá un estrito carácter secreto, e os seus participantes
obríganse a gardar unha estrita reserva sobre el, mentres non se chegue a un acordo
conxunto de facelo público.
Protocolo secreto hispano-alemán. Hendaia, 23-10-1940 [cast.]
Querido Duce: (...) A prolongación da campaña do leste e a presenza dos americanos
no continente africano, crearon en Europa unha situación chea de inquietudes.
As garantías que esta orde ofreceu a España non teñen máis que un mero valor formal.
Se España é respectada serao por canto poida pesar como inimiga. Neste sentido,
realizouse a nosa mobilización, dentro das posibilidades que o país ofrece, e
esforzámonos por reforzar o noso armamento.
A iso responde tamén o estreitamento das nosas relacións con Portugal, que afianza a
súa solidariedade con Europa e reforza a posición de Salazar fronte ás maquinacións e
os intentos de axitación dos anglosaxóns.
Non necesito encarecervos con canta atención sigo os episodios desta loita, no meu
desexo constante de servizo ao interese europeo, que é o noso propio, e nese mesmo
espírito se move a nosa diplomacia, partindo da confianza na fortaleza do Eixe e de
que, nin ao interese de Europa nin ao da propia Inglaterra, convén a prolongación
dunha contenda en que Norteamérica busca o aniquilamento de Europa, e que para
estes propósitos Rusia constitúe a proa do seu ataque.
Cos mellores votos polo provir da vosa nación e os máis sinceros pola vosa persoal
ventura, envíovos co meu afecto un fraternal abrazo.
Francisco FRANCO. Carta a Mussolini. 30-1-1943 [cast.]
8. Pervivencia da guerrilla antifranquista
A actividade guerrilleira en España mantívose durante a longa
posguerra nos anos corenta e cincuenta, a pesar da falta de apoios desde
o exterior e dos escasos éxitos por derrubar ao réxime franquista.
Señor Embaixador: Ao coñecer a súa viaxe por Galicia non puiden resistir a tentación
de dirixirme a vostede. (...) En verdade chegou vostede nun momento interesante.
Ignoro se entre as visitas realizadas se encontran os cárceres de Galicia e a asistencia
aos consellos de guerra onde se condena a morte como nos mellores días de Hitler.
Descoñezo se nos agasallos que lle brindaron figurou a asistencia ao acto de aforcar o
día 3 de setembro, en Pontevedra, a Luís Blanco e Diego Valero; o día 20, en Lugo, a
Manuel Álvarez, e o 21 a Xulio Nieto e Ramón Vivero. (...) Eran cinco antifascistas
8
galegos (...) e eses cinco mártires foron aforcados polo cómplice de Hitler, mentres
vostede, mister Mallet, estreitaba as mans ensanguentadas dos verdugos falanxistas.
Nós, os guerrilleiros, entendemos moi pouco de sutilezas diplomáticas. Pero
entendemos moito de lealdades. Dez anos de vicisitudes e loita forxaron en nós, xentes
de escasa cultura, sinxelos e honestos (...) unha clara visión da decencia política e do
honor. O feito de que Franco engada unhas decenas máis de cadáveres ao millón de
vítimas da súa traizón, iso non inflúe para nada nas cotizacións da City. A misión dun
embaixador da S.M. é máis elevada. España no seu conxunto, as súas riquezas, a súa
posición estratéxica, son algo máis fundamental. E esta si que é causa dos seus
elevados desvelos, porque unha España libre e soberana pode aumentar e diminuír
ceros nos dividendos dos moi dignos piares do imperio inglés.
Manuel PONTE PEDREIRA [xefe da IV Agrupación de Guerrilleiros de Galicia].
Carta ao embaixador inglés. 5-10-1946 [cast.]
9. Foucellas
En Galicia, a actividade guerrilleira contra o réxime de Franco foi moi
intensa, destacando a figura de Foucellas.
Benigno Andrade García, coñecido como Foucellas, foi o máis temible de todos os
guerrilleiros pola audacia dos seus golpes de man. Xefe dunha das unidades en que se
dividía o grupo de Ponte, á morte deste tomou o mando dos grupos centrais de
guerrilleiros. As súas accións tiveron particular importancia nos montes que rodean as
rías da Coruña, Betanzos e Ferrol, onde tiña atemorizados a todos os franquistas que
no ano 1936 distinguíranse como asasinos.
Foucellas é un heroe de lenda. Acabou por chamarse a todos os movementos de
guerrillas en Galicia "os foucellas". Foucellas era un home de estatura mediana,
fornido e dunha enerxía irresistible, que reflectía na súa mirada. Era, como todos os
guerrilleiros, un campesiño. Reunía aos habitantes das aldeas e lles pronunciaba
pequenos discursos, que os campesiños aplaudían con entusiasmo.
Nunha ocasión enviou ao alcalde de Silleda, Manuel García Cerviño, unha carta na
que lle esixía a cantidade de oitenta mil pesetas que debería ter na casa durante os
cinco últimos días dun determinado mes. O alcalde entregou o escrito ao tenente da
Garda Civil e este pediu reforzos. Nun momento en que a escolta do alcalde estaba
formada por un cabo e cinco números chegou Foucellas con uniforme de Garda Civil,
conducindo a un comandante e a un tenente que facilmente penetraron na casa do
alcalde e nas súas propias narices leváronlle o diñeiro.
Foucellas foi capturado baixo unha traizón preto de Betanzos no ano 1951 e executado
inmediatamente na Coruña. Este final de Foucellas determinou a fin da resistencia
armada en Galicia.
Galicia hoy, Ruedo Ibérico. París, 1966 [cast.]
Debemos condenar e condenamos ao procesado Benigno Andrade García (a)
"Foucellas", como autor dun delito de formar partidas armadas dedicadas á bandidaxe,
como xefe da partida nuns casos e compoñente da mesma noutros, sen concorrer
9
circunstancias modificativas da responsabilidade da pena de morte (...) debendo
abonar en concepto de responsabilidades civís aos herdeiros das vítimas a cantidade de
450.000 pesetas, así como a de 35.500 pesetas en proporción ás cantidades subtraídas
a cada unha das persoas que foron obxecto de roubos perpretados a man armada.
CONSELLO DE GUERRA. Sentencia na causa de Benigno Andrade García. A
Coruña, 26-VII-1952 [cast.]
10. A ONU condena ao réxime de Franco
As relacións de Franco cos países fascistas desencadeantes da Guerra
Mundial e a negativa do ditador a establecer en España un réxime
democrático, levaron á ONU a condenar o franquismo en 1946,
impedindo que España formase parte dos organismos internacionais.
En San Francisco, Potsdam e Londres, os pobos das Nacións Unidas condenaron o
réxime de Franco e decidiron que, mentres continuase ese réxime, España non sería
admitida no seo das Nacións Unidas (...).
A Asemblea Xeral recorda que, en maio e xuño de 1946, o Consello de Seguridade (...)
chegou por unanimidade á conclusión de que:
a) En orixe, natureza, estrutura e comportamento xeral, o réxime de Franco é un
réxime de carácter fascista, establecido en gran parte mercé á axuda da Alemaña nazi
de Hitler e da Italia fascista de Mussolini.
b) Durante a longa loita das Nacións Unidas contra Hitler e Mussolini, Franco, a pesar
das continuas protestas dos Aliados, prestou unha axuda moi considerable ás potencias
inimigas (...).
A Asemblea Xeral, convencida de que o Goberno fascista de Franco en España foi
imposto pola forza coa axuda das potencias do Eixe, (...) non representa ao pobo
español (...):
Recomenda que se exclúa ao goberno español de Franco como membro dos organismos
internacionais creados polas Nacións Unidas ou relacionadas con elas (...) ata que se
instaure en España un goberno novo e aceptable (...).
Recomenda que todos os membros das Nacións Unidas retiren inmediatamente aos seus
embaixadores e ministros plenipotenciarios acreditados en Madrid.
ASEMBLEA XERAL DA ONU. Resolución sobre as relacións dos membros das
Nacións Unidas con España. 12-12-1946 [cast.]
11. Protestas obreiras e represión
Os anos corenta foron tempos difíciles para todos aqueles que non
estaban aliñados co sistema franquista. A pesar da dureza da represión,
nas fábricas e nas minas os obreiros iniciaron un lento pero progresivo
movemento de protesta e reivindicación.
Hai uns meses 60.000 obreiros cataláns nunha grandiosa folga conseguen aumento do
xornal e maior racionamento. O mes pasado son os valentes obreiros do Arsenal de
Ferrol quen declaran unha folga xeral que durou tres días. O miserable racionamento
que lles concederan estaba servindo aos xerarcas sindicais e autoridades franquistas
10
para facer lucrativos negocios. Pero os traballadores do Arsenal non esqueceron o
camiño polo cal noutros tempos lograban o respecto aos seus dereitos. Sen vacilación
fixeron uso da súa mellor arma: a folga.
Esta folga é un espello no que debe mirarse toda a clase obreira e ofrece un caudal de
ricas experiencias. O feito de producirse nunha empresa do Estado, a unanimidade e
decisión manifestada, mostra as enormes posibilidades que existen para multiplicalas,
máxime cando os obxectivos son tan sentidos e convincentes como a conquista do pan.
Esta folga, como a de días máis tarde na construción de Lugo, son un mentís rotundo
aos que todo o esperan do exterior e tratan de xustificar o seu medo dicindo que os
obreiros e o pobo non están dispostos a sacrificarse por "pequenas cousas" ou que
estas carecen de transcendencia e valor político. Vaia se teñen transcendencia e valor
político! Hoxe calquera acción, por pequena que sexa, ten marcado carácter político e
contribúe poderosamente a debilitar ao réxime. Nestas accións parciais, a clase obreira
tempera as súas forzas, acumula experiencias e novas enerxías para futuras accións de
maior envergadura. (...)
A clase obreira para saír vitoriosa necesita estar organizada, facendo de cada fábrica,
taller e obra, un fortín de combate, dirixida polos obreiros máis conscientes e
combativos, polos máis audaces e alleos ao pánico. Se os esbirros franquistas puideron
paralizar a folga do Arsenal aos tres días, se puideron facer detencións e exercer
represalias, foi debido a que a folga carecía dunha sólida dirección unificada, porque o
valor e decisión manifestada na súa iniciación non se viu apoiada por unha
organización forte, polos sindicatos de clase. (...) Canto mellor organizada estea a
clase obreira, canto máis sólida sexa a súa unidade, máis posibilidades de éxito terán
as súas loitas e máis curtos os prazos para liquidar os verdugos e explotadores
franquistas. A reconstrución dos sindicatos e a creación dos comités UXT-CNT son
condición imprescindible para gañar as batallas parciais na loita contra a fame, pola
rebaixa dos alugamentos, por un maior racionamento, polo aumento dos salarios nun
50% e contra todas as formas da bestial explotación franquista.
A folga do Arsenal de Ferrol, Mundo Obrero. Boletín do Comité de Galicia do Partido
Comunista. Agosto de 1946 [cast.]
En Asturias, principalmente nas cuncas mineiras, o franquismo ten destacadas unhas
brigadas especiais da Garda Civil, reforzadas con elementos extraídos, polo seu
instinto criminal, das milicias falanxistas. Estas brigadas veñen cometendo innúmeros
crimes, de que son vítimas pacíficos e esgotados traballadores, vingándose así da
impotencia para acabar cos grupos de guerrilleiros que, en once anos de resistencia,
seguen loitando pola liberdade de España, con medios ofensivos moi escasos, pero
derrochando valor inigualable.
Durante o mes de abril as brigadas especiais detiveron nos seus propios domicilios, ao
regresar do traballo, a vintedous cidadáns, só por estar fichados como militantes do
Partido Socialista (...). Estiveron presos varios días, ao cabo dos cales, e despois de ser
atormentados, sufriron a máis espantosa das mortes. As brigadas especiais de Langreo
conduciron aos vintedous presos ao lugar denominado Pena Maior (...) onde hai un
11
pozo natural chamado "Pozu Funeres" e foron asasinados. Como? Lanzando aos
vintedous desgraciados ao mencionado pozo. Os máis venturosos morreron ao chocar
os seus corpos contra o fondo; os máis infortunados, para aumento dos seus
sufrimentos, aínda conservaron vida algúns días. Do pozo saían lamentos de agonía
que, unidos a un insoportable fedor, serviron para denunciar a traxedia. Os verdugos
puxeron termo a esta facendo estallar, entre os moribundos e os cadáveres, cartuchos
de dinamita e botando gasolina que as explosións se encargaron de incendiar. Así
quedaron seguros de que ninguén sobreviviría.
PSOE. Informe sobre os acontecementos no Pozo Funeres. 1948 [cast.]
12. Relacións co Vaticano: o Concordato de 1953
As relacións do réxime franquista co exterior deron un xiro importante en
1953. Nese ano Franco conseguiu renovar o Concordato co Vaticano,
reafirmado o dominio da relixión e da Igrexa católica en España. A
sinatura dese tratado foi o primeiro paso para o reinicio das relacións
diplomáticas co exterior.
No nome da Santísima Trindade: a Santa Sede Apostólica e o Estado español,
animados do desexo dunha fecunda colaboración para maior ben da vida relixiosa e
civil da nación española, determinaron estipular o seguinte Concordato que, asumindo
os convenios anteriores e completándoos, constitúa a norma que debe regular as
recíprocas relacións das altas partes contratantes, en conformidade coa lei de Deus e a
tradición católica da nación española.
Art.1. A relixión católica, apostólica, romana segue sendo a única da nación española e
gozará dos dereitos e prerrogativas que lle corresponden en conformidade coa lei
divina e o Dereito canónico.
Art.2. O Estado español recoñece á Igrexa católica o carácter de sociedade perfecta e
garántelle o libre e pleno dereito do seu poder espiritual e da súa xurisdición, así como
o libre exercicio do culto (...).
Art.3. Para manter na forma tradicional as amigables relacións entre a Santa Sede e o
Estado español, continuarán permanentemente acreditados un embaixador de España
na Santa Sede e un nuncio apostólico en Madrid. (...)
Art.23. O Estado español recoñece plenos efectos civís ao matrimonio celebrado
segundo as normas do Dereito canónico. (...)
Art.26. En todos os centros docentes de calquera orde e grao, sexan estatais ou non
estatais, a ensinanza axustarase aos principios do dogma e da moral da Igrexa
católica.
Art.27. O Estado español garante a ensinanza da relixión católica como materia
ordinaria e obrigatoria en todos os centros docentes.
Concordato entre o Estado español e a Santa Sede. 27-8-1953 [cast.]
13. O convenio cos Estados Unidos
O pacto cos EE UU (26-9-1953), permitiulle ao réxime franquista xogar
un novo papel internacional no contexto de Guerra Fría, o de abandeirado
12
contra o comunismo. Ademais, co apoio dos norteamericanos, España foi
admitida progresivamente nos organismos internacionais.
O pacto cos Estados Unidos non representa ningunha viraxe na nosa política
internacional, como tampouco na nosa política interna, porque para chegar a el non
abandonamos ningunha das nosas directrices fundamentais.
É xa un tópico internacional proclamar a España precursora na loita contra o
comunismo soviético (...). Pois ben, ante o novo perigo dunha agresión comunista, a
única actitude lóxica de España estaba en entenderse con aquela nación que, tanto por
ser forte e poderosa como por representar hoxe no mundo o máis decidido espírito dos
pobos libres contra a agresión, podía prestarnos a colaboración necesaria a fin de
previr debidamente aquel posible transo. Pero España non acudiu a Estados Unidos
para que eles a defendan, pois isto sería impropio de españois, senón para que
colaboren con ela en preparar a súa defensa e acelerala, xa que sen esta preparación,
a nosa seguridade podería perigar ou a súa defensa esixirnos sacrificios ilimitados (...).
Moito menos significan estes acordos rectificación algunha da nosa traxectoria política
interior, porque, xusto é dicilo, nin os Estados Unidos o pretenderon, nin o Goberno
español consentiría semellante inxerencia (...).
Sen supoñer desviación algunha na nosa marcha, os pactos representan, dentro do
noso itinerario político e usando unha expresión americana, dúas grandes
"oportunidades" para España.
É a primeira, a de defendernos eficazmente se o comunismo, Deus non o queira,
desencadease en Europa a terceira guerra mundial (...).
A outra oportunidade de que vos falei é a de traballar na nosa reconstrución
económica e social, contando desde agora, mercé ao xogo de convenios, cos medios
financeiros que necesitamos para acelerar o ritmo de produción e obter do noso
traballo nacional un maior rendemento e da nosa riqueza unha renda mellor.
Alberte MARTÍN ARTAJO [ministro de Asuntos Exteriores]. Discurso. 30-11-1953
[cast.]
14. Os inicios da política liberalizadora: o Plano de Estabilización de 1959
O fracaso da política e do modelo económico autárquico franquista
provocou a súa substitución por unha nova política que tivo o seu inicio
coa aprobación en 1959 dun Plano de Estabilización, que establecía
medidas liberalizadoras no comercio exterior e na produción interior, e
que foi a base do desenvolvemento económico dos anos sesenta.
O Decreto-Lei que a continuación se articula establece a liberalización progresiva da
importación de mercadorías e, paralelamente, a do seu comercio interior; autoriza a
convertibilidade da peseta e unha regulación do mercado de divisas; faculta ao
Goberno para modificar as tarifas de determinados impostos, e ao Ministro de Facenda
para ditar normas acerca do volume de créditos.
É indubidable que as medidas restritivas de emerxencia entrañaban un carácter
transitorio. Superadas aquelas circunstancias, chegou o momento de iniciar unha nova
etapa que permita colocar a nosa economía nunha situación de máis ampla liberdade,
13
de acordo coas obrigacións asumidas por España como membro de pleno dereito da
OECE. A maior flexibilidade económica que se establecerá gradualmente non supón en
ningún caso que o Estado abdique do dereito e da obrigación de vixiar e fomentar o
desenvolvemento económico do país. Pola contra, esta función poderá exercerse con
maior axilidade, suprimindo intervencionismos hoxe innecesarios. A nova etapa da
nosa vida comercial traerá consigo, sen dúbida, unha relación adecuada de custos e
prezos, de acordo coas circunstancias reais da demanda e a produción.
Deste modo espérase obter a estabilidade interna e externa da nosa economía, o
equilibrio da balanza de pagos, o robustecemento da confianza no noso signo
monetario e, en suma, a normalización da nosa vida económica (...).
DISPONGO:
Art.1. As mercadorías que, en virtude das obrigacións asumidas por España como
membro de pleno dereito da OECE, sexan declaradas de libre importación, quedarán
igualmente liberalizadas no interior do país (...).
Art.3. O Goberno proporá ás Cortes ou ditará, en caso de urxencia, as oportunas
disposicións para previr e combater as prácticas monopolísticas e demais actividades
contrarias á normalidade do comercio e á flexibilidade da economía (...).
Art.5. Autorízase ao Goberno para establecer, a proposta do ministro de Comercio, a
convertibilidade da peseta.
Francisco FRANCO. Decreto-Lei de ordenación económica. 21-7-1959 [cast.]
15. Protesta do clero vasco
As críticas ao réxime franquista incrementáronse na década de 1960.
Especial relevancia tivo a denuncia dun grupo de sacerdotes vascos sobre
os malos tratos e a falta de liberdades do réxime franquista; aínda que a
xerarquía eclesiástica desautorizou a protesta, a denuncia puña de
manifesto que o réxime perdía apoios na Igrexa, un dos principais piares
lexitimadores da súa existencia.
Fundamos a nosa análise na doutrina ben coñecida da Igrexa sobre os dereitos
naturais dos home e dos pobos (...). Cremos sinceramente que nin os individuos nin as
clases nin os pobos que integran a comunidade política española gozan de suficiente
liberdade. Basta abrir os ollos para ver o que é unha triste realidade. Continuamente
vemos que son detidas persoas polas súas actividades temporais, non coincidentes co
pensamento político (...). Detense por manifestar, pública ou privadamente, opinións
contrarias ás do Goberno, en materia de seu opinable. E ao faltar os medios normais
de expresión da verdade convértese en delito o que de seu non é máis que o exercicio
dun dereito. O Foro dos Españois é letra morta e a súa representación ante o mundo,
reflexo da insinceridade do clima español (...).
Copiando da relixión o dogmatismo, establece a inefabilidade para o Xefe, con todas as
consecuencias que diso proveñen (...). Parece absurdo, pero en España non existe nin
auténtico Parlamento, nin liberdade pública, nin liberdade sindical (...). O partido
único, o sindicato único e o Parlamento dirixido son a estrutura básica do Estado
español, sometido plenamente ao Xefe (...).
14
Denunciamos ante os españois e ante o mundo a política que hoxe impera en España,
de omisión, de esquecemento, cando non de encarnizada persecución das
características étnicas, lingüísticas e sociais que nos deu Deus aos vascos (...). E non
hai razón histórica, social nin política que xustifique semellante crime.
339 SACERDOTES VASCOS. Carta aos bispos de Bilbao, San Sebastián e Vitoria.
30-5-1960 [cast.]
16. Evolución política do conde de Barcelona
Xoán de Borbón, conde de Barcelona e fillo de Afonso XIII, reclamou de
Franco o trono que lle correspondía por dereito de sucesión lineal da
monarquía española tras a abdicación de seu pai en xaneiro de 1941 en
Roma. Pero Franco non estaba disposto a ceder o poder mentres vivise e
para el debía producirse, despois da súa morte, a instauración dunha nova
monarquía inspirada nos principios do novo réxime. Tampouco
favoreceu a causa do conde de Barcelona a evolución da súa posición
política con respecto a Franco, alternando declaracións de apoio (ata o
punto de querer loitar con sublevados durante o conflito) con esixencias
de que Franco abandonase o poder.
De novo uno a miña voz á de tantos españois para felicitar entusiasta e
emocionadamente a V.E. por liberación capital de España. O sangue xeneroso
derramado pola súa mellor xuventude será prenda segura do glorioso porvir de
España, Unha, Grande e Libre. Arriba España!
XOÁN DE BORBÓN. Telegrama a Franco. Roma, 1-4-1939 [cast.]
Unicamente a Monarquía tradicional pode ser instrumento de paz e de concordia para
reconciliar aos españois; só ela pode obter respecto no exterior, mediante un efectivo
Estado de Dereito, e realizar unha harmoniosa síntese da orde e da liberdade en que se
basea a concepción cristiá do Estado. (...) Desde que (...) asumín os deberes e dereitos
da Coroa de España, mostrei a miña disconformidade coa política interior e exterior
seguida polo xeneral Franco. (...) Por estas razóns, decídome, para descargar a miña
conciencia da angustia cada día máis urxente da responsabilidade que me incumbe, a
levantar a miña voz e requirir solemnemente ao xeneral Franco para que, recoñecendo
o fracaso da súa concepción totalitaria do Estado, abandone o poder e dea libre paso á
restauración do réxime tradicional de España, único capaz de garantir a relixión, a
orde e a liberdade.
XOÁN DE BORBÓN. Manifesto de Lausanne.19-3-1945 [cast.]
O sistema político de constitución aberta que hoxe rexe e que será herdado polo réxime
futuro, permíteme afirmar sen facer violencia algunha ao meu pensamento, a miña
adhesión aos principios e leis fundamentais do Movemento, que ademais de estar
implícitos na doutrina tradicional española, levan en si prevista a flexibilidade
necesaria fronte a todas as esixencias da evolución e da vida.
XOÁN DE BORBÓN. Carta a Franco. Estoril, 10-7-1961 [cast.]
15
17. A loita armada de ETA
ETA naceu como un movemento revolucionario vasco de liberación
nacional, contra o réxime de Franco, e adoptou como táctica a loita
armada e o terrorismo. Un dos primeiros asasinatos foi o do xefe da
Brigada Social de Guipúscoa, Melitón Manzanas.
Como tantos outros peóns do capitalismo español, Melitón Manzanas estaba
condenado a morte desde hai moito tempo. (...) O mesmo pobo, que coñecía ben as súas
actividades, tíñao sentenciado a morte. O pasado 2 de agosto, ETA executou esta
sentencia do pobo.
Pero non queremos que esta execución sexa considerada como un feito illado, como
unha vinganza privada de pouca importancia. A execución do policía Manzanas é un
importante paso adiante na nosa loita revolucionaria e adquire o seu verdadeiro valor
ao situalo dentro desta loita. Isto quere dicir que temos avanzado ata esta execución, o
que significa un avance non soamente na Fronte Militar senón un avance global nas
nosas 4 Frontes (xustamente o avance nas Frontes Cultural, Económica e Política é o
que o fixo posible); quere dicir que xa non podemos retroceder e que seguiremos
adiante pola única forma de loita que hoxe nos é posible, polo único camiño que a
violencia fascista nos deixou aberto; seguiremos adiante mentres o pobo nos axude e
queira que sigamos, mentres o noso pobo siga comprendendo que ser vasco e ser pobo,
hoxe, significa loita. Loita a morte, como diciamos no último Zutik. Ou eles ou nós. Ou
patria ou morte. A nosa loita, a loita do pobo traballador vasco, xa non pode deterse
ata que Euskadi sexa independente e socialista.
ETA. Manifesto. Agosto de 1968 [cast.]
18. Franco resolve a cuestión sucesoria en 1969
Aínda que España quedaba definida como reino no ano 1947, a elección
dun rei que lle sucedese na xefatura do Estado non foi resolta ata 1969,
descartando Franco a Xoán, o fillo de Afonso XIII, e elixindo a Xoán
Carlos, o neto.
Queridísimo papá: Acabo de volver de El Pardo a onde fun chamado polo
Xeneralísimo. O momento que tantas veces che repetira que podía chegar, chegou e
comprenderás a miña enorme impresión ao comunicarme a súa decisión de
propoñerme ás Cortes como sucesor a título de rei.
Resúltame dificilísimo expresarche a preocupación que teño nestes momentos. Quérote
moitísimo e recibín de ti as mellores leccións de servizo e de amor a España. Estas
leccións son as que me obrigan, como español e como membro da Dinastía, a facer o
maior sacrificio da miña vida e, cumprindo un deber de conciencia e, realizando con
iso o que creo que é un servizo á patria, aceptar o nomeamento para que volva a
España a Monarquía e poida garantir o futuro ao noso pobo, coa axuda de Deus,
moitos anos de paz e prosperidade.
Nesta hora, para min tan emotiva e transcendental, quero reiterarche a miña filial
devoción e inmenso cariño, rogando a Deus que manteña por encima de todo a unidade
16
da familia e quero pedirche a túa bendición para que ela me axude sempre a cumprir,
en ben de España, os deberes que me impón a misión para a que fun chamado.
Xoán Carlos de BORBÓN. Carta [a seu pai, don Xoán]. 15-7-1969 [cast.]
Nos momentos en que, en cumprimento do artigo VI da Lei de Sucesión, tomo a
decisión de propoñer ás Cortes o meu sucesor na Xefatura do Estado en favor do voso
fillo don Xoán Carlos, quero comunicárvolo e expresarvos o meus sentimentos pola
desilusión que poida causarvos, e a miña confianza de que saberedes aceptalo coa
grandeza de ánimo herdada do voso pai don Afonso XIII. Imaxino os sentimentos
contradictorios que esta noticia vai espertar no voso ánimo; pero a grandeza da
Monarquía está precisamente en ser un camiño de sacrificio das persoas leais á
Institución. Por iso permítome previrvos contra o consello daqueles seguidores que ven
defraudadas as súas ambicións políticas. (...)
Confío que esta decisión non alterará os lazos familiares do voso fogar, xa que as
nosas diferenzas constitúen un imperativo de servizo á patria por encima das persoas.
Un saúdo con todo afecto e consideración.
Francisco FRANCO. Carta [a don Xoán de Borbón]. 16-7-1969 [cast.]
19. Xoán Carlos, o fillo que non tivo Franco?
Tras a publicación do manifesto de Lausanne de 1945, as relacións entre
Franco e o Conde de Barcelona foron moi tensas, culminando coa
decisión de Franco de 1969 de apartalo da sucesión no trono de España
en favor de seu fillo, Xoán Carlos, quen foi proclamado príncipe
herdeiro. Hai quen pensa que Franco viu en Xoán Carlos o fillo que non
tivo.
Pregunta [Vilallonga]. Que tipo de relacións mantivestes con el [con Franco]?
Resposta [Xoán Carlos]. Dado o home frío e misterioso que era, as miñas relacións
con Franco foron máis ben boas. Era moi amable, e a miúdo afectuoso, e sempre moi
respectuoso co que eu representaba aos seus ollos.
- P. Tense dito que vos consideraba como a un fillo.
- R. Como ao fillo que nunca tivo?... Quizá si. Non deixaba de ser un home estraño.
Cando regresei a España despois de casar con dona Sofía, en 1962, non sabía en que
ocupar o meu tempo. A pesar da miña formación militar, sabía que Franco non ía
permitir que me encerrase nun cuartel ou que servise a bordo dun barco de guerra.
Entón fun velo e díxenlle: "Meu xeneral, teño que ocuparme en algo. Son demasiado
novo para estar sen facer nada". Miroume en silencio durante largo rato. Cando tiña
que responder a unha pregunta que lle parecía importante, Franco sempre se tomaba
tempo. Finalmente díxome: "Facede que os españois vos coñezan, Alteza". E non dixo
unha palabra máis. Eu tiña que comprender e decidir cal era a mellor forma de que os
meus compatriotas me coñecesen.
Xosé Luís de VILALLONGA. O Rei. Conversacións con don Xoán Carlos I de
España. 1995 [cast.]
17
20. Atado e ben atado
A institucionalización do réxime franquista foi lenta e prolongada.
Comezada durante a Guerra Civil, estableceuse definitivamente en 1969,
coa designación do seu sucesor, o que lle permitiu a Franco dicir: todo
queda atado e ben atado.
Respecto á sucesión á Xefatura do Estado, sobre a que tantas maliciosas especulacións
fixeron quen dubidaron da continuidade do noso Movemento, todo quedou atado e ben
atado, coa miña proposta e a aprobación polas Cortes da designación como sucesor a
título de rei do Príncipe don Xoán Carlos de Borbón. Dentro e fóra de España foi
recoñecido, tanto cos aplausos como cos silencios, a prudencia desta decisión
transcendental. Os nosos descendentes comprobarán que a nova monarquía española
foi instaurada en virtude das votacións populares reiteradas no prazo de vinte anos, no
referendo nacional de 1947, que aprobou a Lei de Sucesión, e na do 1966, que
referendou a Lei Orgánica do Estado. Teñen sido, pois, dúas xeracións de españois as
que deron o seu voto multitudinario ao noso sistema político.
Francisco FRANCO. Mensaxe de fin de ano. 30-12-1969 [cast.]
21. Nacemento e características das Comisións Obreiras (CC OO)
Os anos sesenta foron os da reorganización do mundo obreiro que, en
torno ás comisións obreiras, ligadas tanto aos comunistas como a grupos
católicos e na clandestinidade, lograron importantes éxitos infiltrándose
na organización oficial do sindicalismo vertical e nas eleccións dos
enlaces sindicais.
Desígnase co nome de Comisións Obreiras a unhas organizacións obreiras, opostas ao
sindicalismo oficial, que pretenden converterse nun sindicato obreiro de clase, á marxe
da legalidade (...). O nome, utilizouse, por primeira vez, nun conflito laboral que tivo
lugar en 1956 na mina asturiana de La Camocha e que foi o xerme da folga de 1957
(...). Atravesa despois desta data unha época escura na que aparecen cando xurde un
conflito e desaparece cando se soluciona. É a partir de 1962 cando xurde a súa actual
configuración e en 1964 cando cobran forza con ocasión das deliberacións do convenio
do metal de Madrid. O Partido Comunista, dándose conta das súas posibilidades, lanza
a través de OSO [Oposición Sindical Obreira] consignas para que se constitúan
Comisións Obreiras onde non estaban constituídas e fortalecer as xa existentes, aínda a
costa das súas propias organizacións. Ao mesmo tempo lévase a efecto a táctica de
infiltración nos sindicatos oficiais e nesta situación produce un gran confusionismo ao
conxugar as medidas legais coas ilegais (...).
As Comisións utilizan para as súas reunións locais da Igrexa (HOAC [Irmandade
Obreira de Acción Católica], JOC [Xuventude Obreira Cristiá], Acción Católica). (...)
Están integradas nas empresas, pero aparentemente carecen de órganos permanentes
para a unión e coordinación local, provincial ou nacional. É un movemento espontáneo
da masa obreira apolítica, preocupada tan só dos problemas inmediatos da xustiza
social; pero no fondo é un movemento controlado e ferreamente dirixido polos seus
líderes, militantes do P.C. (...) A solución é óptima, perfecta; dirixentes integrados na
18
férrea organización do P.C. e masa desorganizada. O resultado é que o P.C. dará
coherencia ao movemento a través dos seus dirixentes. (...)
Os anarquistas e socialistas non apoian ás Comisións Obreiras, aínda que algúns, con
carácter individual, intégranse nelas. No ano actual, 1971, a actividade das Comisións
Obreiras céntrase na participación nas eleccións sindicais. Polo contrario, os
socialistas, anarquistas, marxistas-leninistas e trotskistas preconizan a abstención.
MINISTERIO DA GOBERNACIÓN. Informe confidencial sobre CC OO. Novembro
de 1971 [cast.]
22. Os sucesos do 10 de marzo de 1972 en Ferrol
Un fito importante das protestas obreiras contra o franquismo, que
combinaba reivindicacións proletarias con esixencias de
democratización, marcárono os sucesos de Ferrol, en 1972, nos que
resultaron feridos máis de vinte obreiros e dous caeron mortos.
Aquela noite [10-3-1972] reunímonos uns cantos dirixentes de CC OO (...) e
preparamos as mobilizacións do día seguinte para forzar a reapertura da factoría
(Bazán). Quedaramos xa na asemblea en concentrarnos nas portas á hora de entrada, e
programamos entón mobilizarnos durante a mañá por Ferrol para reclamar que as
portas se volvesen a abrir e a readmisión dos despedidos (...).
O mesmo día dez a primeiras horas da mañá había moita policía secreta por Ferrol
(...). Ao ver que as portas estaban pechadas decidimos realizar unha manifestación
cara ao barrio de Caranza, xa que alí traballaban moitos obreiros da construción aos
que iamos pedir solidariedade (...).
Ao pasar xa o cruce das Pías, cando a cabeza da manifestación estaba chegando á
ponte da Rúa Nova de Caranza, chegaron numerosos coches da Policía Armada desde
as Casas Baratas e intentaban dividir en dúas a manifestación e dispersarnos (...).
Daniel Niebla caeu diante de min morto dun tiro na fronte e Xulio Aneiros foi ferido de
gravidade dun balazo no pescozo. A policía despois montou nos coches e escapou.
Rafael PILLADO. O dez de marzo en Ferrol, A Nosa Terra. Novembro de 1988.
Hoxe por Galicia, hoxe polos obreiros de Bazán, mañá polos traballadores e amigos de
Euskadi, de Cataluña, de Asturias, de Valencia, de Sevilla, de Madrid e de toda
España. Mostremos a nosa solidariedade activa cos obreiros de Ferrol, coas familias
das vítimas; que a nosa loita, que a nosa protesta, estendéndose dun extremo a outro de
España, que o noso NON ao franquismo, o noso NON aos asasinos de traballadores de
Bazán sexan a expresión máis viva e combativa da vontade de loita das masas para
poñer fin á sanguenta ditadura franquista; que sexa un poderoso impulso cara á
unidade de todas as forzas de oposición ao réxime.
Dolores IBÁRRURI, Pasionaria [presidenta do Partido Comunista de España].
Chamamento aos obreiros, A Voz do Pobo. Órgano do Partido Comunista de Galicia.
14-3-1972 [cast.]
19
23. A organización do atentado contra Carrero Blanco
En 1973 Franco nomeou presidente do Goberno ao seu máis fiel
colaborador: Luís Carrero Blanco, o home da súa máxima confianza que
representaba o inmobilismo a todos os niveis, o denominado búnker.
Pero o novo Goberno presidido por Carrero foi moi breve porque o 20 de
decembro de 1973 falecía vítima dun atentado de ETA (operación ogro)
levado a cabo polo comando Txikía.
- Como xurdiu a idea de execución de Carrero Blanco?
- Xabier. Moi sinxelo. Chegou a noticia á Organización de que Carrero ía todos os
días a misa de nove aos xesuítas na rúa Serrano (...). Non tiña moita vixilancia (...).
Entón foi cando se comeza a analizar o asunto: Carrero é o home clave do réxime (...)
e, polo tanto, el é a persoa indicada para un secuestro, (...) co que se podería conseguir
a liberación dos presos.
- Nun principio pensastes nun secuestro?
- Xoán. Si. Esa foi a primeira intención da Organización. Ti sabes que desde o Proceso
de Burgos a Organización propuxérase sacar aos seus militantes dos cárceres. (...)
Tiña que ser alguén que tivese moito peso dentro do Goberno (...), por iso Carrero era
a persoa idónea. (...)
- Por que lle chamabades Ogro?
- Xoán. (...) Pola pinta de bruto que tiña, as cellas moi poboadas, pelos por todas
partes, impoñía moito.
- Por que executalo?
- Xabier. Porque a execución en si tamén tiña un alcance e uns obxectivos políticos
clarísimos. (...) Carrero simbolizaba mellor que ninguén a figura do "franquismo
puro".
Eva FOREST. Operación Ogro. 1993 [cast.]
24. Fundación da UMD
A oposición ao réxime de Franco, no exército, estivo representada pola
Unión Militar Democrática, organización fundada en agosto de 1974 que
defendía que a institución militar non fose un obstáculo no camiño cara á
democracia.
Tense escrito e escribirase moito sobre a UMD. Pero se se quixese resumir o que
sucedeu coa súa fundación creo que podería valer a afirmación de que: "(...) O exército
do xeneral Franco non era monolítico; tiña fisuras". E se se quere resumir aínda máis o
que sentimos entón os alí reunidos, todo cabe nunha palabra "esperanza".
Discutiuse ata a saciedade o ideario. E discutiuse tamén o nome que había que poñer
ao proxecto que nacía. Todos estabamos de acordo en que nas nosas siglas debía
aparecer a palabra militar. Rapidamente alguén dixo unión e a partir de aí xurdiu a
necesidade de adxectivala. Alguén dixo republicana, outro monárquica. Incluso
pensouse en española -o que se desbotou de inmediato polas connotacións coa vella
UME, alma do alzamento de 1936- e, por fin, sen que ninguén se lembre de que boca
saíu a palabra, todos quedamos de acordo en democrática. Logo foi máis fácil barallar
20
as letras e, tras una unánime votación, naceu a Unión Militar Democrática (UMD).
Unión, porque sentiamos o compañeirismo; Militar, porque era a nosa fe, e
Democrática porque no nos sentiamos súbditos, senón cidadáns españois.
Guillerme REINLEIN. Así fundamos a UMD. 1983 [cast.]
25. A cuestión do Sahara
Na colonia española do Sahara xurdiu un movemento independentista
encabezado pola Fronte Polisaria. Paralelamente, o territorio foi
reclamado por Marrocos. En 1975 os acontecementos aceleráronse.
Oficialmente, o réxime de Franco recoñeceu o dereito do Sahara a súa
autodeterminación. Pero, aproveitando a feble posición internacional de
España e os problemas internos derivados da precaria saúde de Franco, o
rei Hassan II de Marrocos organizou o 31 de outubro de 1975 unha
marcha de 200.000 marroquís (a Marcha Verde) que invadiu o territorio
sahariano coa intención de anexionalo e obrigando a ceder ao goberno de
España.
Á Asemblea Xeral do Sahara: (...) O Goberno, seguindo as miñas instrucións, estudou
as aspiracións do pobo saharauí (...) e elaborou a seguinte contestación (...) que
mereceu a miña sanción:
1. O Estado español reitera que o pobo saharauí (...) é o único dono do seu destino e
ninguén ten dereito a violentar a súa vontade. O Estado español defenderá a liberdade
e a vontade de libre decisión do pobo saharauí. (...)
4. O Estado español reitera e garante solemnemente que a poboación do Sahara
determinará libremente o seu futuro. Esta autodeterminación terá lugar cando o
solicite libremente a poboación, de conformidade co exposto pola Asemblea Xeral [do
Sahara].
Francisco FRANCO. Mensaxe á Asemblea Xeral do Sahara. 21-9-1975 [cast.]
O Sahara estaba irremisiblemente perdido. Intentárase unha saída de
autodeterminación pero a precaria saúde de Franco, a tenacidade de Hassan e os
receos que a Fronte Polisaria suscitaba en occidente puxeran ao deserto a mercé de
Marrocos. O exército español, con gran moral, estaba decidido a defender a soberanía
española sobre as inmensas areas africanas. Porén, non estaba en condicións de
soportar un continuo acoso en todas as fronteiras (...); pero, sobre todo, a Facenda
Pública non podería manter unha guerra de desgaste, cuns apoios loxísticos carísimos
(...).
A única posibilidade de resolver o problema pola vía da guerra sería un conflito aberto
con Marrocos. Algo inimaxinable en 1975 entre dous veciños aliados dos Estados
Unidos. O príncipe, en funcións de xefe do Estado, e as Forzas Armadas sabían,
ademais e por riba de todo, que no deserto saharauí non se encontraba o honor nin a
dignidade de España (...). O drama do Sahara non estaba en si mesmo, senón nos
momentos en que se provocaba. Cun Franco agonizante e o príncipe en precaria
interinidade, o conflito podía dexenerar en derrotas de gran perigo. A tentación dalgún
21
militar naquela conxuntura non era descartable. E, porén, instalouse o sentido común,
unha profunda serenidade pese á crispación formal e don Xoán Carlos puido
comprobar que o pobo respondía e que a cadea de mando militar funcionaba con
disciplina.
Non entanto, o príncipe quixo cubrir o flanco exterior nos dous puntos neurálxicos:
Washington e París. Don Xoán Carlos non quería dar entón a sensación externa de
mandar como se Franco xa estivese morto. Actuaría con eficacia, pero coa máxima
discreción. Así, o 30 de outubro de 1975 encarga a un home da súa absoluta confianza
dúas delicadas misións: visitar a Kissinger [Secretario de Estado norteamericano de
Exteriores] e a Giscard d’Estaing [presidente de Francia] a título estritamente persoal
aínda que, naturalmente, da súa parte. (...) España deixaba aquel territorio, miles de
millóns de puñados de area e uns problemáticos fosfatos á voracidade internacional.
Xoaquín BARDAVÍO. O enviado do príncipe, Historia da Transición. Diario 16. 1984
[cast.]
26. Os acordos de Madrid
Para evitar o conflito bélico con Marrocos polo Sahara, e ante a
debilidade interna e internacional, o goberno de España asinou en Madrid
un acordo con Marrocos e Mauritania, aprobando o reparto do Sahara
entre eses dous países sen escoitar a opinión dos saharianos. O 28 de
febreiro de 1976 España abandonou o Sahara. A Fronte Polisaria non
aceptou o acordo e mantivo a guerra armada pola independencia.
Reunidas as delegacións que lexitimamente representan os gobernos de España,
Marrocos e Mauritania, maniféstanse de acordo nos seguintes principios:
1. España ratifica a resolución -reiteradamente manifestada ante a ONU- de
descolonizar o territorio de Sahara occidental poñendo termo ás responsabilidades e
poderes que ten sobre dito territorio como potencia administradora.
2. De conformidade coa anterior determinación e de acordo coas negociacións
propugnadas polas Nacións Unidas coas partes afectadas, España procederá de
inmediato a instituír unha administración temporal no territorio na que participarán
Marrocos e Mauritania, en colaboración coa Asemblea Xeral do Sahara, e na cal serán
transmitidas as responsabilidades e poderes a que se refire o parágrafo anterior.
DECLARACIÓN DE MADRID. 14-11-1975 [cast.]
39. A imperiosa necesidade de cambio
Os meses finais do réxime franquista foron especialmente conflitivos;
todo indicaba que o cambio estaba próximo e resultaba imparable.