Coma paissèl e soca

La Sauze

Coma paissèl e soca

Jamai plegarà pus lo cap jos la vergonha, Çaquelà nòstre amor es pas quicòm de fièr. Lo temps l’a matrassat, tustat coma de cuèr, Las annadas l’an mai rosegat que la ronha. Nosautres, nòstre amor es pas nascut de ièr. Tanben nos sèm aimats a tustas e a bustas Mai d’un còp, lo bonur marchèt a còr ranquet, E per nos calinhar, i anèrem a pinquet. Mas nosaus sèm talhats dins la metèissa fusta : Nos aimarem totjorn un pauc mai qu’un pauquet. Almens avèm tastat a d’amors bartassièras. N’as lo pòt que lusis de tant que i as gostat, Ieu, lo morre me dòl, coma un qu’òm a mostat. Èri un chic femnassièr et tu sauta paissièras, Avèm fòra nisat cadun de son costat. Creguèrem despenjar las estelas perdudas E nos encigalar de tots los aigardents. Lo matin, cada còp nos a trapats perdents, Que de tròp mossegar las fruchas defendudas, A bèl cais, sus un clòsc, nos asclèrem las dents. Puèi sèm dintrats al jaç, un vèspre de setembre, Ambe lo còr macat, quichat coma un costal, Retrobar lo bonur al vièlh còdi postal, E dins mil ans, mai mai, servarem lo remembre D’aver cercat plan luènh l’amor qu’èra a l’ostal. Dempuèi gardam per el l’uèlh gelòs d’una cloca E quand l’Auriva nos prendrà dins son vaissèl, Mai se tot vira pas plan redond sus l’aissèl, Mai se los mots d’amor an fugit nòstra boca, Demorarem ligats coma soca e paissèl, Demorarem ligats coma paissèl e soca. Cantat per La Sauze

Paissèl : tuteur

Vergonha : honte Çaquelà : cependant Matrassar : meurtrir. Cuèr : cuir Rosegar : ronger. Ronha : gale A tustas e bustas : au hasard, à l’étourdie A pè ranquet : à cloche pied. Calinhar : courtiser. A pinquet : peu Pauquet : un petit peu Bartassièras : dans les buissons Mostar : barbouiller avec des raisins Femnassièr : coureur de jupons. Paissièra :barrage, digue Nisar : nicher Encigalar : étourdir, griser, enivrer Cais : dents. Clòsc : noyau, coque. Asclar : fêler. Jaç : gite, couche Costal : aici syn de semal (comporte) Servar : garder, conserver. Remembre : souvenir Gelòs : jaloux. Cloca : poule couveuse L’Auriva : la mòrt(Godolin). Vaissèl : vaisseau Aissèl : essieu