memoria descritiva e grÁfica das actividades de … · lingüística. a actividade consistiu na...
TRANSCRIPT
MEMORIA DESCRITIVA E GRÁFICA DAS
ACTIVIDADES DE FOMENTO DO USO DO
GALEGO
Dende o equipo de dinamización lingüística, sempre en coordinación cos equipos de
biblioteca e actividades complementarias e extraescolares, propuxemos, recomendamos,
orientamos e asesoramos sobre a posta en marcha das seguintes actividades distribuidas
por trimestres.
1º TRIMESTRE:
DÍA DAS BIBLIOTECAS ESCOLARES
Para conmemorar o Día Internacional das Bibliotecas Escolares, do 19 ao 27 de outubro
leváronse a cabo unha serie de actividades nas que os nenos e nenas de primaria
exploraron as seccións da nosa biblioteca, seguiron as pistas que lles deixou Pepón (a
nosa mascota), traballaron en equipo, colleron o seu primeiro libro e algún ou algunha
levou a mochila viaxeira.
Cunha mensaxe nunha botella empezou a actividade de 1º a 4º:
” Pepón proponche un xogo que mola mogollón… serás aventureir@ e ademais
explorador . Se atopas o camiño , que gran emoción! “
Para os maiores a actividade baseouse en descrifrar cinco mensaxes secretas e facer o
que alí se pedía:
"a/orodarolpxe narg oneuqep sáres sarficsed sexasnem sa es…nóllogom alom
euq ogox nu nu ehcnoporp nópeP"
SAMAÍN
Os días 28 e 29 de outubro celebrouse a festa de Halloween-Samaín cunha gran
exposición de manualidades na entrada do colexio, partindo dun rolo de papel hixiénico.
Ademais houbo:
un obradoiro de maquillaxe para os nenos/as de EI,
un obradoiro de cociña terrorífica nas clases de 1º e 2º,
visionado do vídeo-conto "A lenda do espantallo",
exposición de libros de medo na biblioteca,
e un terrorífico túnel do terror.
MAGOSTO
O mércores 11 de novembro celebramos no Curros a festa do magosto.
Houbo unha degustación de froitos de outono, froitos secos, marmelos... e, por suposto,
castañas.
Tamén levamos a cabo unha sesión de xogos populares, organizada polos mestres de
Ed. Física, a través da cal pretendemos o achegamento do alumnado ós xogos de
tradición popular,adaptándoos ás idades dos nenos e nenas( o tirasoga, o tres en raia, a
carreira de sacos, os bólos,...)
DÍA CONTRA A VIOLENCIA DE XÉNERO
Porque NON QUEREMOS VIOLENCIA DE XÉNERO, dende o Curros tentamos que
os máis pequenos tomasen conciencia de que homes e mulleres somos todos iguais.
O libro escollido foi:
O libro dos Porcos de Anthony Browne (Ed. Kalandraka)
Os alumnos/as maiores do centro fóronlles co conto ao resto do colexio e invitáronos a
pensar quen é a persoa da súa casa que traballa máis, se eles fan algo para axudar un
chisco...
Os/as mestres/as traballaron logo con eles//as o tema nas aulas.
CONCURSO TARXETAS DE NADAL
Fíxose una exposición de tarxetas de nadal.
As tarxetas gañadoras foron enviadas como felicitación ás familias. Escolleuse unha
por ciclo.
Estas foron as bases:
E así quedou a exposición de tarxetas:
FESTIVAL DE NADAL
Para celebrar o Nadal levamos a cabo diversas actividades moi lúdicas para os nenos e
nenas do colexio nas que tamén eles/as participaron activamente:
obra de teatro "Espantallo amigo" de Neira Vilas, adaptada polo grupo Os
Quinquilláns,
obra de teatro do grupo do colexio coa obra: Nadal 2030. Zona cero.,
actuación da rondalla,
do grupo de pandeiretas
da little band
e entrega de agasallos aos gañadores do concurso de tarxetas de nadal.
2º TRIMESTRE:
DÍA DA PAZ
Este curso, aproveitando que varios mestres/as tocan diferentes instrumentos: guitarra,
teclados, baixo, violín..., decidimos facer unha gran orquesta acompañados polos nenos
e nenas de 5º e 6º de Primaria (eles/as coas frautas) para celebrar o Día da Paz.
A canción escollida foi Blowind in the wind.
A canción pódese ver e escoitar na nosa canle de Youtube.
ENTROIDO
Este ano o entroido do Curros fixo unha pequena viaxe por diferentes culturas do
mundo.
Previamente todo o colexio fixo un traballo de investigación para coñecer mellor a
cultura do país que lle tocou representar.
ANIMACIÓN Á LECTURA
LECTURAS CO KAMISHIBAI
O equipo de voluntarios e voluntarias da biblioteca quixo agasallar aos seus
compañeiros/as cunhas sesións de contos co teatrillo xaponés kamishibai.
Os contos elixidos foron:
O gato con botas, para educación infantil
Por que hai tantas pedras no fondo dos ríos?, para toda a primaria.
Do 16 ao 24 de febreiro durante a HORA DE LER os diferentes cursos foron pasando
pola biblioteca para deleitarse coas imaxes e as historias que os nenos e nenas de 5º e 6º
ían contando.
ANIVERSARIO DE ROSALÍA
Para celebrar o nacemento de Rosalía de Castro en Padrón (A Coruña) un 24 de febreiro
de 1837, dende a biblioteca propuxéronse dúas actividades:
1ª: Un puzzle da imaxe de Rosalía (reinterpretación en estilo pop feita polo Rei
Zentolo).
2ª:Coñecemos a súa vida
Para facer esta última actividade pode e debe consultarse o blog da nosa biblioteca
(actividade de emprego das TICS).
SEMANA DA POESÍA
Os nenos e nenas de 5ºEP ( voluntarios/as da biblioteca) recitaron pola megafonía do
centro, durante a Hora de Ler, un poema cada día.
Aproveitando que este ano o Día das Letras Galegas dedícaselle a Manuel María, as
poesías que se escoitaron foron da súa autoría.
Estas foron as poesías de Manuel María que se "degustaron":
ANIMACIÓN Á LECTURA
VISITA DOS COELERNI EXPLORADORES
Os luns, na hora de ler, os Coeleni exploradores estiveron lendo historias aos devorado-
res de libros de educación infantil.Vai por sorteo, cada luns tócalle a dous/tres nenos/as
de infantil.
3º TRIMESTRE
ANIMACIÓN Á LECTURA
Un grupo de alumnas de 6º EP contoulles o conto "O soño de Esther"( escrito por
Miguel Ángel Alonso Diz e ilustrado por Luz Beloso) ao alumnado de educación
infantil.
Noa, Irea, Sheila, Helena, Ana, Nayara e Ainoa estiveron preparando durante moitos
días a historia.
Ademais da interpretación, fixeron unhas preciosas manualidades coas que
ambientaron o conto.
Esta vez fóronlles co conto a nenos/as de 1º, 2º e 3º curso de primaria.
Ainhoa, Lucía, Marta e Jorge foron os encargados de deleitar aos nenos agraciados coas
lecturas: "Bola de manteiga" e É rara Makeke?
Os días 12, 13 e 14 de abril un novo grupo de alumnas de 6º contoulle ao alumnado de
infantil o conto: "O valente coello que quixo soñar" escrito por Miguel Ángel Alonso
Diz e ilustrado por Luz Beloso).
Durante esta semana pasada un grupo de alumnas de 6ºEP contoulle o conto "Seis
barbudos" ( escrito por Mar Pavón e ilustrado por Vitali Konstantinov) , a todo o
alumnado de educación infantil.
Antón, Brais, Noa, Celia, Iván, Rebeca e Fátima Jeimar estiveron preparando durante
moitos días a historia. Ademais da interpretación, fixeron unhas preciosas
manualidades coas que ambientaron o conto.
DÍA DO LIBRO
O día 23 de abril celebramos o Día do Libro coa actividade “Apadriña un lector”
organizada polo equipo de biblioteca en colaboración co equipo de dinamización
lingüística. A actividade consistiu na lectura dun libro por parte do alumnado de 3º a 6º
aos nenos e nenas de infantil e 1º e 2º de primaria.
O libro escollérono días antes na biblioteca, tendo en conta a idade dos oíntes, para
preparar a lectura do mesmo.
O espazo escollido para as lecturas foi o patio de infantil. A hora elixida foi a "hora de
ler”.
LETRAS GALEGAS
O mércores 18 de maio celebramos no Auditorio de Celanova o Día das Letras Galegas
coas seguintes actividades:
actuación do grupo de teatro do centro coa súa función "O Elixir",
pandeirada por parte dos alumnos de pandeireta,
actuación do grupo musical Little Band,
presentación da curtometraxe "Diamantes",
presentación do libro de teatro "Facendo Teatro" realizado polos alumnos/as
de 5º e 6º.
PRESENTACIÓN DO LIBRO FACENDO TEATRO
Na elaboración do libro participaron os nenos e nenas de 6º de Primaria, para elaborar
as historias, baixo a supervisión dun mestre coordinador e o alumnado de 5º para
realizar as ilustracións coa supervisión do mestre de pintura de extraescolares.
PRESENTACIÓN DA CURTAMETRAXE “DIAMANTES”
Obradoiro de audiovisuais: os nenos e nenas que participan neste obradoiro foron os
protagonistas da curtametraxe titulada “Diamantes”.
Está colgada na nosa canle de Youtube.
COORDINADORA COMARCAL
Os alumnos/as dos centros da coordinadora comarcal de dinamización lingüística Terras
de Celanova-Baixa Limia participaron ao longo do curso levando a cabo diferentes
actividades:
Elaboración dun almanaque tendo en conta a paisaxe da contorna vista dende un
punto de vista romántico.
Exposición de traballos sobre o romanticismo na paisaxe.
Encontro pola normalización lingüística na comarca.
XUNTANZA CURROS ENRÍQUEZ
Esta actividade, á que asistiu o alumnado de 5º EP, que está organizada pola
Fundación Curros Enríquez, pretende reunir periodicamente en Celanova aos alumnos
dos centros que levan o nome do poeta e realizar actividades na súa vila natal entre as
que destacan: coñecemento da vila de Celanova, concerto didácticos de órgano no
mosteiro de San Rosendo, visita á Casa dos Poetas e á capela de San Miguel,
coñecemento da obra dos autores de Celanova e dos arredores e visita a Vilanova dos
Infantes e ao Cristal.
TEATRO DE MONICREQUES
O alumnado de 4º de Primaria presentou a obra de teatro de monicreques “Romeo e
Xulieta: amor baixo dunha maceta” creada por eles/as.
Esta obra está enmarcada no ámbito do desenvolvemento da capacidade lingüística,
tanto oral como escrita.
Hai que dicir tamén que os monicreques tamén foron creados polos nenos e nenas de 4º
dentro dun obradoiro de manualidades.
Páxina web e uso das novas tecnoloxías
Destaca a utilización da páxina web do centro como medio de información continua
cara as familias e toda a comunidade escolar, como medio para ver as actividades que se
fan no centro, as visitas, as excursións e como recurso para realizar actividades variadas
cos alumnos: xogos, busca de información, visualización de vídeos,….
Nela fomos metendo información das actividades promovidas polo Equipo de
Dinamización Lingüística en colaboración cos Equipos de Biblioteca e de Actividades
Complementarias e Extraescolares.
O enderezo da nosa páxina web é:
http://centros.edu.xunta.es/ceipcurrosenriquez.celanova/
Utilizáronse tamén o encerado dixital, os ordenadores da aula de informática e os da
propia aula para desenvolver as actividades de fomento do uso do galego.
Tanto os nenos/as como os mestres/as utilizamos o blog canistrel ( blog da biblioteca)
para informarnos de actividades que ían acontecer, resolver enigmas, música e libros
que se podían utilizar, etc...
Todo o alumnado acudiu puntualmente durante os períodos de recreo para utilizar os
ordenadores da biblioteca para buscar información, facer traballos, entreterse con xogos
educativos... (emprego das TICS)
Todos os mestres/as do centro asistimos con regularidade, ao longo do curso, a
pequenos cursos de formación relacionados coas novas tecnoloxías coa finalidade de
reflectir estes coñecementos na práctica co alumnado.
AVALIACION DO PROXECTO
En xeral a valoración do desenvolvemento do Proxecto de Actividades foi satisfactorio.
Fixemos como sempre, máis actividades das que estaban previstas (foron xurdindo ao
longo do curso) pero que resultaron de gran interés xeral para os/as nenos/as.
Acadamos plenamente os obxectivos propostos no noso proxecto, tanto a nivel de
contorno como a nivel de profesorado, alumnado e centro.
A Dirección do centro colaborou en todo o que se lle pediu.
Houbo unha gran participación, implicación, esforzo e traballo por parte de mestres/as e
alumnos/as nas actividades propostas e da comunidade escolar en xeral. Os pais, nais e
familias participaron principalmente nas festas tradicionais como o Magosto e o
Entroido, colaboraron no Samaín, coas tarxetas de nadal, xogo dos enigmas, tamén
aportando material para a posta en marcha de diferentes actividades e sempre que se
solicitou a súa axuda..
Vimos unha resposta moi positiva ás actividades propostas en colaboración co equipo
de biblioteca: Samaín, Día do Libro, concurso de tarxetas de nadal, Día da poesía…
Tamén houbo colaboración co Concello, coa Fundación Curros Enríquez, co IES de
Celanova e coa Cooordinadora Comarcal Terras de Celanova e Baixa Limia.
As propostas de actuación de mellora cara o vindeiro ano, céntranse principalmente no
tocante ao mellor aproveitamento e uso das novas tecnoloxías e dos recursos
audiovisuais, xa que resultan ser un medio moi atractivo para o alumnado, e estaremos
abertos/as a todas as iniciativas que xurdan a principio de curso no noso Equipo. Dende
logo continuaremos coas actividades que por experiencia consideramos de interés entre
a comunidade escolar.
Celanova, 21 de xuño de 2016