hondakinen inguruko akordio berriaren balorazioa | birziklategia - 2013.05.16
DESCRIPTION
Zumaiako Hondakinen Mahaiko partaide guztien artean sinatu berri den honakinen inguruko akordio berriaren balorazioa datorkigu Birziklategitik.TRANSCRIPT
Guztiz ezinezkoa bazirudian arren, badirudi Zumaian hondakinen bilketaren kontuaren inguruko
akordioa dagoela. Akordio hau, EAJ, Atez atekoaren aurkako plataforma, PSOE, Zumaiako Natur
Taldea, Zumaiako Zero Zabor, Aralar, Eusko Alkartasuna eta Ezker Abertzaleak izenpetu dute.
Akordioa irakurtzeko, hemen daukazue atxikita:
Gaurko sarreraren asmoa, era eskematiko eta ulerterrazean akordioaren inguruko irakurketa
azkarra egitea litzateke. Ea ba:
Akordioak orokorrean baditu hainbat puntu oso onak direnak birziklatzearen alde eta errausketaren aurka
gaudenontzat. Izan ere:
• Joko politikoak alde batera utzi eta helburua emaitzetan jartzen du, %80ko emaitza argi azalduz
helburu gisa. Fokua helmugan jarrita, bidea adosteko zimenduak ere ezartzen ditu.
• Honela argi uzten du helburua ez dela sistema bat, helburua %80ko emaitzak direla eta sistemak
azter daitezkeela emaitza hauek emateko moduko bermeak badituzte. Berme hauek bete litezke
adostutako sisteman, pertsonalizatua eta kontrolatua baita. Beraz ez birziklatzeak aukera izateari
uzten dio.
• Gainera, sistema berri bat proposatzera dator, ez egun dauden sistemetakoren bat baztertzera . EAJk
bere medioetan aurkakoa salduko badu ere, akordioan ez da atez atekoa baztertzea aipatzen.
%80ko emaitzak lor ditzakeen sistema berri bat probatzea adosten da.
• Lehen aldiz eta beste inon ez bezala PNVk eta Plataformak sistemak kontrolatua eta pertsonalizatua
izan behar duela onartu du. Frakzio guztientzat txipdun edukiontziak onartu dituzten lehen aldia
izateaz gain, barra kodedun poltsak frakzio guztietarako onartzen diren lehen aldia da. Bi ezaugarri
hauekin uneoro pertsonalizatua da bilketa, eta akordioan “integrala eta kontrolatua” bezala
definitzen da.
• Lehen aldiz eta beste inon ez bezala PNVk eta Plataformak %80ko emaitzak jarri dituzte helburutzat.
Gogoratu plataformak duela hilabete batzuk %55eko helburua proposatu ziola Udalari. EAJk, berriz,
beti esan izan du %80ko gaikako bereiztea ezinezkoa eta gezurra dela.
• %80ko helburu honek de facto desaktibatzen du errauskailuaren beharraren ideia. Zumaian %80 bada
helburua, zergatik Gipuzkoako beste tokietan ez? Orain arte gehiengo politikoaren arabera zihoan
hau, orain PNVk onartu du %80a. Beraz kolore politiko guztietako udaletan egokitu daiteke
adostasun hau. Honek agerian utziko luke Gipuzkoan errauskailu bat egitea zorakeria hutsa dela,
240.000 tona horietatik (hauetarako dago diseinatua errauskailua) 50.000 exkax izango
liratekeelako %20a.
• Zumaian eman den akordioa herriz-herri zabaltzen joateko aukera dago. Ez luke zentzurik PNVk ezetz
esatea, Tolosan adibidez, Zumaian baietz esan dionari. Baina are gehiago, Bilduk gehiengo osoa ez
duen herrietan ere ezar liteke sistema mota berri hau (Orereta, Lasarte, Donostia?,...) beraz
Gipuzkoan dagoen blokeoa hausteko modu bat izan daiteke.
Arrazoi guzti hauengatik eta oposizioak hondakinen gaiarekin duen pagotxa jokoan ikusita Diario Vasco eta
Noticias egunkariak hasiak dira jada akordioaren benetako edukia desbirtuatzen , atez atekoa baztertzen duen
eta Itsasondo zein Lazkaoko sistemaren ingurukoa den akordio bat dela zabalduz. Benetako akordioa
irakurriz gero oso bestelakoa da kontua.
Baina akordioak baditu bere arriskuak ere:
• Sistema hau ez da beste inon probatu, beraz ez dago ziurtasun erabatekorik %80 inguruko emaitzak
emateko gai dela esateko. Arriskatu beharra esan nahi du honek. Ongi atera liteke eta hemendik
aurrera %80 inguruko emaitzak ematen dituzten bi sistema mota eduki, edota gaizki atera daiteke
eta emaitza hauek ez eman.
• Sistema honen bideragarritasuna (batez ere ekonomikoa) ikusteke dago. Hau teknikarien lana izango
da, baina aztertu beharko da diru kostuen etab. en arabera zenbateraino den sistema jartzeko
modukoa.
Beraz aurrerantzean ikusi beharko da, ea sistema berria zertan gauzatzen den eta ea behin
gauzatuta emaitzak ematen dituen edo ez. Baina garrantzitsuena lortuta dago: Errausketa zaleak
mugiarazi dira, %80ko emaitza aho bateko helburua da. Nola horretan asmatzea da orain kontua.
Ikusiko dugu sistema berriak asmatzen duen edo ez.